بدخشان ته د سرو زرو د کانونو لپاره د درنو ماشینونو استول او دوامداره نښتې
سيمه ييزې سرچينې وايي، زرګونه درنې ماشينې وسيلې د بدخشان ولايت د سرو زرو کانونو ته استول شوي دي؛ دا اقدام د بېرويو استخراج د زياتېدو او د هغې د پايلو په اړه اندېښنې زياتې کړي دي.
په تېرې اوونۍ کې د بدخشان او تخار ولايتونو په ځينو برخو کې د طالبانو د ادارې ځواکونو، چينايي شرکتونو او د سيمې د اوسېدونکو تر منځ د کانونو د راايستنې د طريقې او اندازې په اړه سختې لانجې رامنځته شوې دي، چې د تاوتريخوالي سبب شوې دي. په دغو نښتو کې د ملکي وګړو د مړينې او ټپي کېدو راپورونه هم ورکړل شوي دي.
ځايي شاهدان وايي، د سيمهييزو اوسېدونکو اعتراض چې د کانونو راايستل په غيرشفافه بڼه او د خلکو د ګټو له پامه غورځولو سره ترسره کېږي، د طالبانو له لوري په سختو چلندونو مخ شوی او د معدني ساحو پر شاوخوا د ناامنۍ فضا يې نوره هم زياته کړې ده.
په عين وخت کې، د افغانستان جمعيت اسلامي ګوند په يوه اعلاميه کې خبرداری ورکړی چې د طالبانو اداره د هېواد د زېرمو سرچينو ته د «غنيمت مال» په سترګه ګوري. دغه ګوند ټينګار کړی چې د دې بهير دوام کولای شي افغانستان ته نه جبرانېدونکي اقتصادي، چاپېريالي او ټولنيز زيانونه واړوي او د غيرمسؤولانه استخراج د درولو غوښتنه يې کړې ده.
