په استرالیا کې د اسحاق هرتزوګ د سفر پر ضد پراخ لاریونونه
زرګونه تنه د استرالیا اوسېدونکي په ګڼو ښارونو کې د لاریونونو په جوړولو سره د اسحاق هرتزوګ، د صهیونیستي رژیم د مشر، د سفر پر ضد خپل مخالفت څرګند کړی او د هغه د نیولو غوښتنه یې کړې ده.
دغه اعتراضونه له هغه مهال پیل شول چې هرتزوګ د استرالیا رسمي څلور ورځنی سفر پيل کړ. دا سفر د استرالیا د صدراعظم په بلنه ترسره شوی او اعلان شوی هدف یې دا دی چې د تېر کال د دسمبر پر ۱۴مه د سیدني په ښار کې د یوې وسلهوالې حملې وروسته له یهودي ټولنې سره همدردي وښيي.
خو د دې سفر له پیل سره، د استرالیا د ټولنې یو شمېر برخو کې پراخ منفي غبرګونونه راپارېدلي دي. معترضان چې سړکونو ته راوتلي وو، د فلسطین له ولس سره یې د همدردۍ اعلام وکړ او د صهیونیستي رژیم مشر یې د جګړې په جرمونو تورن کړ.
په همدې مهال، د سیدني ښار د سختو امنیتي تدابېرو شاهد و. د استرالیا پولیسو د دې سفر د امنیت ډاډ لپاره شاوخوا درې زره امنیتي سرتېري په بېلابېلو سیمو کې ځای پر ځای کړي دي؛ یو اقدام چې خپله یې هم د عامه افکارو ترمنځ مباحثې او نیوکې راپارولې دي.
