په کندز کې د طالبانو د یوې پوستې پر وړاندې برید شوی
د سيمهييزو سرچينو د راپور له مخې، د جمعې ماښام د مرغومي دولسمه نېټه ۱۴۰۴ کال، شاوخوا د ماښام اووه بجې، د کندز ښار د امام صاحب بندر سړک ته څېرمه د مفتي سراج جومات اړوند يوه د طالبانو امنیتي پوسته د بريد هدف ګرځېدلې ده.
د پېښې په پايله کې لږ تر لږه دوه طالبان وژل شوي او دوه نور ټپيان دي. سرچينې وايي ټپيان روغتون ته لېږدول شوي، خو د دوی د روغتيايي حالت په اړه نور جزئيات نه دي خپاره شوي.
د افغانستان د ازادۍ جبهې د دې بريد مسؤليت منلی او ويلي يې دي چې دغه اقدام د چريکي عملياتو په چوکاټ کې ترسره شوی دی. د خپرو شوو معلوماتو له مخې، د طالبانو يو پوځي موټر هم د بريد پر مهال سوځېدلی او له منځه تللی دی.
د کندز دوامداره ناامني اندېښنې زياتې کړې چې د طالبانو اداره د ښارونو د دايمي امنيت په ټينګښت کې پاتې راغلې ده؛ دا هغه موضوع ده چې د سيمهييزو اوسېدونکو له لوري څو څو ځله نيوکه پرې شوې، خو د طالبانو چارواکو تر اوسه روښانه ځواب نه دی ورکړی.
