په بلوچستان کې ۱۷۹ افغان اتباع نیول شوي
د پاکستان د بلوچستان ایالت امنیتي چارواکو ویلي چې ۱۷۹ افغان اتباع د استخباراتي عملیاتو پر مهال د چاغي ولسوالۍ د نوکونډي او تفتان په سیمو کې نیول شوي دي. د چارواکو په وینا، دغه کسان د یو لږ کارېدونکي لوري له لارې او پرته له قانوني اسنادو د پاکستان خاورې ته داخل شوي وو.
د ورکړل شوو معلوماتو له مخې، دغه عملیات د پاکستان او افغانستان په پوله د ناقانونه تګراتګ د کنټرول لپاره ترسره شوي دي. د چاغي ولسوالي د پاکستان په سویل لوېدیځ کې پرته ده او له افغانستان د نیمروز ولایت سره پوله لري. دا سیمه د هغو لارو له ډلې ده چې ډېر مهاجر پرې تګ راتګ کوي.
په همدې مهال، تېرې اوونۍ په نوکونډي سیمه کې د ترافیکي پېښې له امله ۱۱ افغان اتباع وژل شوي او ۹ تنه نور ټپیان شوي دي. د پېښې د لامل په اړه لا نور جزییات نه دي خپاره شوي.
یادې پېښې یو ځل بیا د افغان اتباعو نازک وضعیت څرګندوي، هغه کسان چې د قانوني لارو د نشتوالي له امله اړ کېږي چې د خطرناکو او غیر خوندي لارو څخه د تګ هڅه وکړي.
