ګوټرش: د خبریالانو چپ کول د ولس غږ خاموشول دي
د ملګرو ملتونو سرمنشي انتونیو ګوټرش د خبریالانو پر وړاندې د جرمونو د معافیت د پای ته رسولو نړیوالې ورځې په مناسبت له هېوادونو غوښتنه کړې چې د خبریالانو حقونه دې خوندي کړي او د هغوی پر ضد تاوتریخوالي په وړاندې دې چوپ پاتې نه شي.
ګوټرش په یوه پیغام کې ویلي که خبریالان چپ کړل شي، نو په حقیقت کې ټول ولس خپل غږ له لاسه ورکوي. نوموړي د مجازاتو نه شتون نه یواځې بېعدالتي بللې، بلکې دا یې د رسنیو پر آزادۍ مستقیم برید ګڼلی دی.
د خبریالانو د ملاتړ ادارې شمیرو څرګنده کړې چې په تېرو څلورو کلونو کې، تر هغې وروسته چې طالبان واک ته رسېدلي، په افغانستان کې د خبریالانو پر وړاندې ۵۳۹ پیښې تاوتریخوالي ثبت شوې دي. دا شمېرې د رسنیو پر وړاندې د پراخ فشار او ځپونکي وضعیت څرګندوی دي، په داسې هېواد کې چې یوه وخت د سیمې له آزادو او پیاوړو رسنیو شمېرل کېده.
ګوټرش دا هم ویلي چې په نړیواله کچه هم له هر لسو خبریالانو وژنو څخه نهه یې بېځوابه پاتې شوې دي. هغه ټينګار کړی: “راځئ چې یو ځای درېږو، د مطبوعاتو له آزادۍ څخه دفاع وکړو، د لا حساب ورکونې غوښتنه وکړو او ډاډ ترلاسه کړو چې هغوی چې واک ته حقیقت وایي، وکولی شي دا کار پرته له ویرې ترسره کړي.”
