د امیرخان متقي او د ازبکستان د هیئت لیدنه د دوه اړخیزو همکاریو پر پیاوړتیا تمرکز وکړ
امیرخان متقي، د طالبانو د ادارې د بهرنیو چارو سرپرست وزیر، له جولان واخوابوف سره چې د ازبکستان د مرکزي آسیا نړیوال انستيتيوټ مشر او د دغه هېواد د ولسمشر مرستیال سلاکار دی، وکتل او خبرې یې وکړې.
په دې لیدنه کې دواړو لورو د کابل او تاشکند ترمنځ د سیاسي او اقتصادي همکاریو د پیاوړتیا پر لارو چارو تمرکز وکړ او د سیمې پر یو شمېر مهمو موضوعاتو یې هم بحث وکړ. دا خبرې د طالبانو د ادارې د هغو هڅو برخه دي چې د ګاونډیو هېوادونو سره د اړیکو د ساتلو او پراخولو لپاره ترسره کېږي.
متقي د افغانستان په اړه د ازبکستان د چلند یادونه وکړه او ویې ویل، تاشکند تل د نېک نیت او مثبت سیاست لاره تعقیب کړې ده. هغه هیله څرګنده کړه چې د دواړو هېوادونو اړیکې او ګډې همکارۍ به په بېلابېلو برخو کې نوره هم پراخې شي.
نوموړي د څېړنیزو بنسټونو رول په متقابل درک، د همکاریو په پراختیا او د سیمهییزو بدلونونو په واقعي ارزونه کې مهم وباله او په دې برخه کې یې د علمي ظرفیتونو د کارونې پر اړتیا ټینګار وکړ.
په مقابل کې، جولان واخوابوف د هغه څه ستاینه وکړه چې «په افغانستان کې پرمختګ او ثبات» یې وباله او څرګنده یې کړه چې هیله لري د روان کال په ترڅ کې د دواړو هېوادونو ترمنځ سوداګري زیاته شي او اقتصادي همکاري نوي پړاو ته داخل شي.
