د ایر کاناډا الوتکې د اوروژنې موټر سره ټکر؛ د لاګوارډیا هوايي ډګر وتړل شو
د «اير کاناډا اکسپرس» مسافر وړونکې الوتکه د نيويارک ښار د لاګوارډيا هوايي ډګر ته د کيناستو وروسته د يو اوروژنې موټر سره وجنګېده؛ هغه پېښه چې د لږ وخت لپاره د ټولو الوتنو لنډمهالى ځنډ رامنځته کړ.
د رويټرز د راپور له مخې، دا الوتکه له کاناډا د مونتريال ښار څخه نيويارک ته روانه وه او د کيناستو پر مهال له هغه اوروژنې موټر سره ټکر کړې چې په سيمه کې موجود و. د هوايي چلند چارواکو د بيړني حالت د اداره کولو لپاره الوتنې د لنډې مودې لپاره ودرولې.
تر اوسه رسمي جزئيات نه دي خپاره شوي چې دا پېښه څنګه رامنځته شوې، خو ځينې راپورونه وايي چې په دې ټکر کې څو تنه وژل شوي او ټپيان دي.
د لاګوارډيا هوايي ډګر د امريکا د تر ټولو بوختو ډګرونو له ډلې څخه شمېرل کېږي او هر ډول خنډ په فعاليتونو کې د سلګونو مسافرو پر تګ راتګ اغېز کولی شي. د پېښې دقيق علت معلومولو لپاره پلټنې روانې دي.
