افغانستان د ملګرو ملتونو امنیت شورا ته د پاکستان د هوايي بریدونو شکایت کړی
نصیراحمد فایق، چې د افغانستان دایمي استازي دنده په ملګرو ملتونو کې پر غاړه لري، ویلي چې د پاکستان د وروستیو هوايي بریدونو له امله یې رسمي شکایت د امنیت شورا ته ثبت کړی دی. د هغه په وینا، دغه بریدونه د ملکي کسانو د مرګ ژوبلې لامل شوي چې پکې ښځې او ماشومان هم شامل دي.
فایق د دوشنبې په ورځ، د حوت په څلورمه، په خپاره شوي پیغام کې ټینګار کړی چې د افغانستان استازولي له امنیت شورا غوښتي چې سمدستي د دې بریدونو مخه ونیسي، عاملان یې عدلي تعقیب ته وسپاري او د ملګرو ملتونو د منشور او نړیوالو قوانینو بشپړ درناوی وکړي. هغه همدارنګه د افغانستان پر د ځمکنۍ بشپړتیا ټینګار کړی دی.
د راپورونو له مخې، د پاکستان جنګي الوتکو تیره شپه د ننګرهار ولایت د بهسود او خوګیاڼو ولسوالۍ او همدارنګه د پکتیکا ولایت د برمل او اورګون ولسوالۍ بمبار کړې دي. د دغو بریدونو په پایله کې لږ تر لږه د یوه کورنۍ ۱۸ غړي په بهسود ولسوالۍ کې وژل شوي چې یو شمېر یې ښځې او ماشومان دي.
بلخوا، د پاکستان چارواکو ویلي چې دغه عملیاتو د هغه څه په نښه کول وو چې هغوی یې د “ترهګرو پټنځایونه” بولي، او شاوخوا ۷۰ کسان په کې وژل شوي دي. دا ادعاوې په خپلواکه توګه نه دي تایید شوې.
د افغانستان دایمي استازولۍ له دې مخکې هم دغه بریدونه غندلي وو. د طالبانو اداره هم دغه بریدونه غندلي او ګواښ یې کړی چې “په مناسب وخت” به ځواب ورکړي، خو تر اوسه د احتمالي غبرګون وخت او څرنګوالی نه دی څرګند شوی. دغه پېښې د پولو پر اوږدو د کړکېچ د زیاتېدو او د ملکي وګړو د زیات خطر اندېښنې راولاړې کړې دي.
