د بلخ کې د ۱۶۰ څخه ډېر ځوانانو لپاره د کانکور ملاتړ پروګرام پيل شو
په بلخ ولایت کې یوه خیریه بنسټ د لوړو زده کړو د دوام د ملاتړ په موخه د ۱۶۰ څخه ډېر ځوانانو لپاره د کانکور ځانګړې چمتووالي پروګرام پيل کړی دی. د دې بنسټ مسؤلین وایي چې دا پروګرام د اقتصادي ستونزو د لېرې کولو او د ځوانانو لپاره د معیاري زده کړو ته د اسانه لاسرسي په هدف عملي شوی دی.
د ورکړل شویو معلوماتو له مخې، ګډونوال به د دغه بنسټ له مالي ملاتړ څخه برخمن شي او د کانکور ځانګړو روزنیزو برنامو لپاره به افغان–ترک تعلیمي مرکز ته معرفی کېږي. دا پروګرام په داسې ډول تنظیم شوی چې د زده کړو لګښتونه، چې د ډېرو کورنیو لپاره درانه دي، د ځوانانو د زده کړو د دوام مخه ونه نیسي.
خیرالدین مایل، د دغې خیریه بنسټ مشر، ویلي چې ملاتړ یوازې د کانکور د چمتووالي مرحلې پورې محدود نه دی. د هغه په وینا، که ګډونوال له کانکور وروسته په هر پوهنتون کې بریالي شي، بنسټ به تر دوکتورا پورې د هغوی مالي ملاتړ ته دوام ورکړي؛ دا اقدام د ځوان نسل لپاره د دوامدارو زده کړو د فرصتونو برابرولو په هدف طرحه شوی دی.
په ورته وخت کې، د افغان–ترک تعلیمي مرکز مسؤلین ټینګار کوي چې د معیاري تعلیمي وسایلو او علمي خدمتونو په کارولو سره هڅه کوي د اغېزمنې زده کړې او د کانکور لپاره د لا ښه چمتووالي زمینه برابره کړي.
یو شمېر ځوانانو چې په دې پروګرام کې شامل دي، د دې فرصت له رامنځته کېدو خوښي څرګنده کړې ده. نجمالدین، چې له ګډونوالو څخه یو دی، دا ملاتړ د خپل تعلیمي راتلونکي لپاره یو مهم ګام بللی او له هېوادوالو سوداګرو او پانګوالو یې غوښتنه کړې چې له نورو محتاجو ځوانانو هم ملاتړ وکړي.
دا پروګرام په داسې حال کې پيلېږي چې په وروستیو کلونو کې د اقتصادي ستونزو د زیاتېدو له امله د ډېرو ولایتونو ځوانان له معیاري زده کړو او د کانکور مناسبې چمتووالي څخه بېبرخې پاتې دي.
