افغانستان د قزاقستان او پاکستان د مشرانو د سولې غونډه کې د بحث مرکز و
افغانستان د ۲۰۲۵م کال په نړیوال کنفرانس «صلح او اعتماد» کې، چې په ترکمنستان کې ترسره شو، د قزاقستان او پاکستان د مشرانو د خبرو اصلي محور و. د قزاقستان ولسمشر، قاسم جومارت توقایف، د جنوبي قفقاز ثبات د سیمې د امنیت لپاره مهم وباله او ویې ویل چې د افغانستان له خلکو سره د دوامدار ملاتړ پرته سیمهییز امنیت نه شي تأمینېدلی. نوموړي نړیوالې ټولنې ته د افغانستان د مرستې او بیا رغونې لپاره د پراخې همغږۍ غوښتنه وکړه.
توقایف د ملګرو ملتونو د سیمهییز دفتر ارزښت ته هم اشاره وکړه، چې په قزاقستان کې د آلماتي په ښار کې موقعیت لري، او ویې ویل چې دغه دفتر، چې د منځنۍ آسیا هېوادونو او افغانستان لپاره جوړ شوی، باید د ګډو همکاریو لپاره یوه مهمه زمینه شي.
په همدې ناسته کې، د پاکستان صدراعظم شهباز شریف د افغانستان په اړه د خپل هېواد پخوانی دریځ تکرار کړ او ادعا یې وکړه چې له افغانستانه د امنیتي ګواښونو کچه لوړېږي. هغه له نړیوالې ټولنې وغوښتل چې طالبان دې اړ کړي څو خپلې نړیوالې ژمنې پوره کړي او د ترهګرو ډلو فعالیتونه ودروي. شریف همداراز د قطر، ترکیې، سعودي عربستان، متحده عربي اماراتو او ایران د هڅو قدرداني وکړه چې د دايمي اوربند لپاره هڅې کوي.
سیاسي شنونکي نجیبالله بهادر په غبرګون کې وویل، پاکستان هڅه کوي چې د تروریزم د خپریدو مسئولیت پر افغانستان واچوي، حال دا چې د سختدریځو ډلو اصلي روزنیز مرکزونه په پاکستان کې دي. د طالبانو اداره تر اوسه د پاکستاني مشرانو وروستیو څرګندونو ته رسمي غبرګون نه دی ښودلی، خو وړاندې یې دا ډول تورونه بېاساس بللي دي.
کارپوهان باور لري چې افغانستان د جغرافیایي موقعیت او وروستیو سیاسي ننګونو له امله د سیمې د امنیتي بحثونو یوه مهمه موضوع پاتې شوی، او د ګاونډیو هېوادونو دریځونه د طالبانو د ادارې په وړاندې کولای شي د منځنۍ آسیا د ثبات پر راتلونکې اغېز ولري.
