د افغانستان د ۲۰۲۶ لپاره د بشري اړتیاوو او غبرګون طرح رسمي پیل شوه
د ملګرو ملتونو د بشري چارو د همغږۍ دفتر (اوچا) اعلان کړی چې د «افغانستان د بشري اړتیاوو او غبرګون طرح» د ۲۰۲۶ کال لپاره په رسمي ډول پیل شوې ده. دا طرح د مرستو د همغږۍ موخه لري څو د خلکو ژوند وژغوري او له زیانمنو ټولنو ملاتړ وکړي.
د دې ارزونې له مخې، افغانستان لا هم د نړۍ له سترو بشري کړکېچونو څخه ګڼل کېږي او اټکل کېږي چې په ۲۰۲۶ کال کې د هېواد نږدې نیمایي نفوس د بشري مرستو اړتیا ولري.
د مرستندویه بنسټونه ټینګار کوي چې د فقر دوام، د ژوند ناامن وضعیت او په ورځني ژوند کې پراخ محدودیتونه د کورنیو فشار ډېر کړی او د خلکو لاسرسی بنسټیزو خدمتونو ته یې ستونزمن کړی دی.
په همدې حال کې، د طالبانو د ادارې سیاستونه او کړنې، په ځانګړي ډول د مرستندویه بنسټونو د فعالیتونو په محدودولو او د ټولنې د لویې برخې له ټولنیز ګډون څخه په حذف کې، د بشري ستونزو د زیاتېدو له عواملو بلل کېږي. بشردوستانه بنسټونه په دې اړه نیوکه کوي او د حساب ورکونې او د چلند د بدلون غوښتنه کوي.
