د افغانستان په ګڼو ولایتونو کې د باران او واورې له امله لږ تر لږه ۱۶ کسان مړه شوي
د ملګرو ملتونو د بشري مرستو د همغږۍ دفتر (اوچا) اعلان کړی چې د سختو بارانونو او واورې له امله په افغانستان کې لږ تر لږه ۱۶ تنه، چې ډېری یې ماشومان دي، ژوند له لاسه ورکړی او لسګونه نور ټپیان شوي دي. دغه اداره خبرداری ورکړی چې د ژمي د نژدې کېدو سره، د بشري وضعیت اندېښنې زیاتېږي او شاوخوا دوه تنه له هر پنځو اوسېدونکو څخه په بیړنیو مرستو اړتیا لري.
اوچا د جمعې په ورځ د دلوې درېیمه راپور ورکړی چې درنه واوره او باران په نورستان ولایت کې د مرګوني ډبرې ښوېدنې سبب شوی او په یو شمېر سیمو کې یې د کورونو چتونه نړولي دي. د دې ادارې په وینا، خرابې هوايي چارې د هغو کورنیو لپاره نوي خطرونه رامنځته کړي چې له وړاندې د فقر او د سرچینو د کمښت سره مخ دي.
په همدې مهال، د ملګرو ملتونو د ماشومانو د ملاتړ صندوق (یونیسف) په خپل ایکس پاڼه لیکلي چې د شپې پر مهال د درنې واورې ورښت د ختیځ افغانستان د زلزلهځپلو ماشومانو حالت لا سخت کړی دی. یونیسف ټینګار کړی چې اړتياوې په چټکۍ سره زیاتېږي او که بیړنۍ مرستې ونهشي، تر ټولو زیانمن قشرونه به له جدي ګواښونو سره مخ شي.
اوچا یو ځل بیا ټینګار کړی چې افغانستان لا هم د نړۍ له سترو بشري کړکېچونو څخه دی؛ داسې کړکېچ چې د طالبانو د ادارې د مؤثرې پلان جوړونې او شفاف ځوابویونې د نشتوالي له امله یې فشار تر ټولو ډېر د عادي خلکو، په ځانګړي ډول ماشومانو او بېوزلو کورنیو پر اوږو دی.
د ملګرو ملتونو دا اداره ویلي چې د بشري اړتیاوو د پوره کولو لپاره د ۱.۷ میلیارده ډالرو مرسته غواړي ترڅو په افغانستان کې ۱۷.۵ میلیونه کسانو ته د ملاتړ زمینه برابره کړي.
له دې سره، د هوا پېژندنې اداره د جمعې په ورځ په بدخشان، نورستان، کنړ، ننګرهار، پنجشېر، کاپیسا، لوګر، لغمان، پکتیا او خوست ولایتونو کې د سختو واورو، بارانونو او تندو بادونو د احتمال خبرداری ورکړی او له اوسېدونکو یې غوښتي چې د احتیاط تدابیر مراعات کړي.
