زلېنسکي: اوکراين د سولې موافقې ته نږدې شوی، خو کمزورې هوکړه نه مني
د اوکراين ولسمشر ويلوديمير زلېنسکي اعلان کړی چې هېواد يې د سولې موافقې د ترلاسه کولو وروستي پړاو ته نږدې شوی، خو زياته کړې چې د جګړې د پای ته رسولو لپاره به له هر ډول هوکړې سره موافقه ونه کړي. زلېنسکي ويلي، د اوکراين او سولې تر منځ واټن «ډېر لږ» دی، خو د هوکړې کيفيت د کيف لپاره بنسټيز اهميت لري.
د نړيوالو رسنيو د راپورونو له مخې، زلېنسکي ټينګار کړی چې اوکراين به هغه کمزورې موافقه لاسليک نه کړي چې يوازې د جګړې د اوږدېدو لامل شي. د هغه په وينا، هر ډول بېاحتياطي لاسليک پر سستې موافقې نهيوازې دا چې دوامدارې سولې ته لار نه پرانیزي، بلکې ښايي د جګړې بيا شدېدو ته هم زمينه برابره کړي.
د اوکراين ولسمشر زياته کړې چې ټولې غونډې، ټيلېفوني تماسونه او پرېکړې چې د هېواد په لوړه کچه ترسره کېږي، د يوې «پياوړې او د باور وړ» موافقې پر ترلاسه کولو متمرکزې دي؛ داسې هوکړه چې د اوکراين راتلونکی امنيت او ثبات تضمين کړي.
دغه څرګندونې په داسې حال کې کېږي چې بل لور ته د روسيې ولسمشر ولاديمير پوتين په جلا وينا کې ويلي، مسکو ځان د اوکراين د جګړې ګټونکی بولي. هغه د نوي کال په مناسبت له روسي وګړو سره په خپل پيغام کې د هېواد پر کورني ظرفيت تکيه يادونه کړې او ويلي يې دي چې روسيه به خپلو اعلان شويو موخو ته ورسېږي.
پوتين همداراز د روسي پوځونو له نقش څخه، په هغه څه کې چې مسکو يې «ځانګړې پوځي عمليات» بولي، ستاينه کړې او ادعا يې کړې چې ميليونونه روسان له خپلو پوځيو ملاتړ کوي؛ دا چلند ښيي چې د جګړې د پای په اړه د دواړو لوريو نظرونه لاهم ډېر واټن لري.
