افغان ایوک له امريکايي کانګرسه د افغان پناهجويانو د بهير د بيا فعالېدو غوښته وکړه
په متحده ايالاتو کې د افغان پناهجويانو ملاتړ کوونکې ادارې «افغان ایوک» له امريکايي کانګرسه غوښتي چې د افغانستان د پناهجويانو د منلو او بيا مېشتېدو د بهير د درېدلو په اړه څرګندې او د پايلو لرونکې استماعي غونډې جوړې کړي؛ داسې غونډې چې پر سرزنش کولو نه، بلکې پر عملي حل لارو تمرکز ولري.
په د دغې ادارې په اعلامیه کې ويل شوي چې دغه غونډې بايد د امريکا د مهاجرتي پروګرامونو، په ځانګړي ډول د ځانګړې مهاجرتي ويزې (SIV) پر تطبيق تمرکز وکړي او روڼتيا رامنځته کړي؛ له دې جملې چې کومې پروسې درېدلې دي، ولې دا وقفه رامنځته شوې او کوم اقدامات کولای شي قانوني لارې بيا پرانيزي.
افغان ایوک همداراز ټينګار کړی چې بايد د هغو کورنيو خوندیتوب وساتل شي چې امريکا پرې د امنيت ژمنه کړې وه. د دې ادارې په باور، دا ژمنې بايد يوازې د همدردۍ په اعلاميو کې محدودې نه پاتې شي، بلکې عملي ګامونو ته اړتيا لري.
دغه اداره وايي چې د امريکا کانګرس د دې پروګرامونو د پرمخ وړلو ټول ضروري وسايل لري؛ له هغو جملې، د هغو قانونسازۍ لارو بيا فعالول چې له اوږدې مودې راهيسې درېدلې دي، لکه «د افغانانو د حالت د تعديل قانون» او «د تل پاتې منلو قانون».
د افغان ایوک په وينا، د نظارتي وسيلو کارول، د بودجې هدفمند وېش او د اجراييوي صلاحيتونو کارونه د مسؤلو ادارو د قانوني مکلفيتونو د پلي کولو لپاره کولای شي د مهاجرتي بهيرونو په بيا راتګ کې مهم رول ولوبوي.
په اعلاميه کې دا هم راغلي چې د کانګرس د نوي کاري کال له پيل سره، د هغو افغان وګړو او د هغوی د کورنيو حالت چې پخوا د امريکا متحدين ول، له هر وخت زياتو عملي ګامونو ته اړتيا لري. متقاعد امريکايي سرتېري او د هغوی افغان همکاران چې لا هم په انتظار کې دي، د کانګرس د عملي پرېکړو منتظر پاتې دي.
افغان ایوک زياتوي، په تېر کال کې د هغو افغان پناهجويانو قانوني لارې چې د امريکا له ماموريتونو سره يې ملاتړ کړی، په عملي ډول درېدلې او د کورنيو يو ځای کېدل بهير ډېر ورو شوی دی. د دغې ادارې په وينا، هغه پروګرامونه چې د کانګرس له لوري تصويب شوي وو، د ځنډ، اداري فلج يا د اغېزمنې مداخلې د نشتون له امله کمزوري شوي دي. دغه حالت د پرېکړو پايله ده، نه يو نهشتونپذير حالت.
په داسې حال کې چې د امريکا ولسمشر ډونالډ ټرمپ، له ۲۰۲۵م کال د جنورۍ په مياشت کې د سپينې ماڼۍ ته له ستنېدو وروسته، د هغو افغانانو د مهاجرت بهير محدود کړ چې د امريکايي ځواکونو متحدين وو. دا هغه کسان دي چې د شل کلنې امريکايي پوځي حضور پر مهال يې د هغوی سره همکاري کړې وه.
په تازه پېښه کې، وروسته له هغه چې يو افغان وګړي د امريکا د ملي ګارد پر دوو غړو ډزې وکړې، ټرمپ په يوه فرمان سره د افغانانو د ويزې ورکولو پروسه په بشپړه توګه ودروله؛ دا اقدام د هغو افغان پناهجويانو د مهاجرتي پروګرامونو د بشپړې درېدنې په اړه جدي اندېښنې راپارولي دي چې د امريکا متحدين بلل کېږي.
