یو افغان چې په امریکا کې مېشت دی، د ځانمرګي برید ګواښ په تور تورن شوی
د امریکا د عدلیې وزارت ویلي چې داوود الکوزی، یو افغان تبعه چې د ټکزاس ایالت د فورت ورټ ښار اوسېدونکی دی، په فدرالي محکمه کې د بم جوړونې ګواښ، ځانمرګي برید ترسره کولو او د امریکایي وګړو د وژلو د تهدید په تور محاکمه کېږي.
د دغه وزارت لهخوا خپاره شوي معلومات ښيي که چیرې پر الکوزي لګول شوي تورونه ثابت شي، ښايي تر پنځو کلونو پورې بند ته محکوم شي. دا جزا د فدرالي جزایي قوانینو له مخې ټاکل شوې ده.
د عدلیې وزارت وایي، دا تورونه پر هغو ویډیوګانو ولاړ دي چې الکوزي په خپلو رسمي ټولنیزو رسنیو لکه ټیکټاک او فیسبوک کې خپرې کړي وې. د امریکایي چارواکو په وینا، په دغو ویډیوګانو کې هغه د زورزیاتي، د ځانمرګي برید او د امریکایي وګړو د وژلو ګواښونه کړي دي.
د امریکا د امنیتي فشارونو له زیاتوالي سره، د دا ډول ګواښونو څېړنه او تعقیب ځانګړې حساسي بڼه اخستې. پر داوود الکوزي د لګېدلو تورونو دوسیه هم له همدې امله له جدي پاملرنې سره مخ ده. دا موضوع په تیره په بهر کې مېشتو افغانانو ته د امنیتي څار زیاتېدو له پلوه د اندېښنې پیغام لري، په ځانګړي ډول اوس چې د طالبانو تر واک ته رسېدو وروسته د افغانستان نړیوال انځور له ګڼو ننګونو سره مخ دی.
