افغان خبریالان په پاکستان کې د بېساري ایستلو له ګواښ سره مخ دي
راپور ورکوونکي بېسرحده سازمان (RSF) په یوې نوې اعلامیې کې د پاکستان کې د افغان خبریالانو د اضطراري حالت په اړه خبرداری ورکړی او ویلي یې دي چې ډېری دغه خبریالان دا مهال په دوامداره ویره کې ژوند کوي چې نیول او ایستل به شي.
یاده نړیواله اداره، چې د رسنیو د آزادۍ ملاتړې ده، وایي چې په تېرو میاشتو کې د پاکستان له لورې د مهاجرینو د ایستلو چټکولو له امله، لږ تر لږه ۲۰ افغان خبریالان چې تر ملاتړ لاندې یې وو، په زور بېرته افغانستان ته لېږل شوي. دا هغه ځای دی چې د بشري حقونو د ارګانونو له راپورونو سره سم، له خوا یې د طالبانو لهخوا د غچ اخیستو خطر موجود دی.
د اعلامیې له مخې، لسګونه داسې نور خبریالان هم چې په جلا وطنۍ کې ژوند کوي، د پاکستاني پولیسو لهخوا ‘خپلسري’ نیول شوي او د بند مراکزو ته استول شوي، او په ځینو مواردو کې حتا له څو ساعتونو دننه له هیواده ایستل شوي دي.
راپور ورکوونکي بېسرحده ویلي چې نږدې ۲۰۰ خبریالانو سره یې مرسته کړې څو په پاکستان کې لنډمهاله پناه ولري، خو د دویمو هېوادونو ته د دوی د انتقال او میشتېدو بهیر د سیستمونو د سُستۍ یا پوره بندېدو له امله څو کاله ځنډېدلی دی.
دا سازمان له پاکستاني حکومت غوښتي چې د افغان خبریالانو د ایستلو لړۍ پای ته ورسوي، او له نړیوالې ټولنې یې غوښتنه کړې چې ژر تر ژره د دې کسانو لپاره قانوني او خوندي لارو چارو برابرې کړي.
د افغان مهاجرینو د ایستلو پالیسي چې د ۲۰۲۳ کال راهیسې د پاکستان لهخوا پيل شوې، سره له دې چې پراخ نړیوال اعتراضونه او ژورنالیستانو او نورو زیانپذیره وګړو ته د خوندیتوب غوښتنې شوي، لاهم دوام لري.
