د ټرمپ نوې ادعا: د ایران نوی ولسمشر له امریکا د اوربند غوښتنه کړې
د امریکا ولسمشر ډونالد ټرمپ یو ځل بیا ادعا کړې چې د ایران نوی ولسمشر له متحده ایالاتو څخه د اوربند غوښتنه کړې ده. ټرمپ په خپل پیغام کې چې په ټولنیز شبکه «تروت سوشل» کې یې خپور کړی، ویلي چې د دغه تازه ټاکل شوي ایرانی چارواکی «تر خپلوانو لږ رادیکال او هوښیار» ګڼي. هغه ټینګار کړی چې واشنګټن به دا غوښتنه یوازې هغه وخت و ارزوي چې د هرمز تنګي خلاص وي.
ټرمپ له دې پرته نور جزئیات نه دي ورکړي، خو وویل چې د اوربند موضوع د هرمز تنګي د سمندري تګ راتګ وضعیت پورې تړلې ده؛ دا هغه ستراتیژیکه سیمه ده چې د نړۍ د انرجۍ د انتقال مهمه برخه ترې تېرېږي. د دې خبر تر خپرېدو د ایران رسمي چارواکو لا تر اوسه د ټرمپ دې ادعا ته غبرګون نه دی ښودلی.
دغه څرګندونې په داسې حال کې کېږي چې له دې وړاندې هم د امریکا ولسمشر د ایران له چارواکو سره د تماس یا خبرو ادعاوې کړې وې. خو د ایران د اسلامي جمهوریت چارواکو بیا په وار وار ویلي چې تر فشار لاندې به هېڅ ډول مستقیمې خبرې ونه کړي.
ایراني رسنیو مخکې راپور ورکړی و چې د ۱۴۰۴ د حوت په نهمه (۲۸ فبروري ۲۰۲۶) د پوځي بریدونو په پایله کې د ایران د اسلامي جمهوریت مشر آیتالله سید علي خامنهای، یو شمېر لوړپوړي پوځيان او ملکي وګړي وژل شوي دي. همدارنګه ویل شوي چې د میناب په یوه ښوونځي د بمبارۍ پر مهال له ۱۷۰ زیات زدهکوونکي ژوند له لاسه ورکړ.
د ایران د چارواکو په وينا، تهران دا بریدونه د خپل حاکمیت پر وړاندې تېری بللی او ویلي یې دي چې د «قانوني دفاع» په چوکاټ کې یې د اسرائیلو اړوند هدفونه او د امریکا ځینې پوځي اډې په نښه کړي او د هرمز په تنګي کې یې د ځینو بېړیو تګ راتګ محدود کړی دی.
دغه وروستي بدلونونه د سیمې کړکېچ تازه پړاو ته رسولی او د شخړو د پراخېدو او د دې وضعیت د اغېزو په اړه د سیمې د امنیت او د نړیوالو د انرجۍ بازارونو د راتلونکې په تړاو اندېښنې زیاتې کړې دي.
