د پاکستان د توپچي برید له امله په کنړ کې يو ښوونځی ويجاړ شو

ځايي سرچينو رسنيو ته ويلي چې د پاکستان پوځ تېره شپه د کنړ ولايت د ناري ولسوالۍ د «سونګله» منځني ښوونځي ودانۍ د توپونو په وسیله نښه کړې ده. د دغو سرچينو په وينا، د دې برید په پایله کې د ښوونځي د ودانۍ ډېرې برخې زيانمنې شوې او د لمر د برېښنا سيستم يې په بشپړه توګه له منځه تللی دی. کنړ ولايت چې د پاکستان له پوله سره نږدې پروت دی، په تېرو کلونو کې هم کله ناکله د پولې پر اوږدو د نښتو او بريدونو شاهد پاتې شوی دی. د سيمې اوسېدونکو څو ځله د دغسې پېښو د زیانونو له امله د ملکي او تعليمي تاسيساتو د خونديتوب په اړه اندېښنه څرګنده کړې ده. تر اوسه د حکومت رسمي چارواکو د دې پېښې د جزئياتو او احتمالي تلفاتو په اړه څرګندونې نه دي کړي.