د نجونو د ښوونځيو د پرانستلو لپاره د ښځو نوې اعتراضي کمپاین
په افغانستان کې د نوي تعلیمي کال له پیل سره هممهاله، یو شمېر ښځو او نجونو د اعتراضي کمپاین په لاره اچولو سره د نجونو لپاره د ښوونځیو او پوهنتونونو د بیا پرانیستلو غوښتنه کړې ده. دا اقدام په داسې حال کې شوی چې د طالبانو اداره لا هم د شپږم ټولګي پورته د نجونو زدهکړې بندې ساتي.
د دغه کمپاین ګډونوالو د ټولنیزو شبکو له لارې د ویډیوګانو په خپرولو سره د دغې تعلیمي محدودیت دوام ته نیوکه کړې ده. یوې معترضې ښځې په یوه پیغام کې ویلي چې له ښوونځیو د دروازو له تړل کېدو څخه څلور کاله تېر شول، خو د افغانستان نجونې لا هم هیله لري چې یو ځل بیا د زدهکړې حق ته لاسرسی ومومي.
هغې ویلي دي: «څلور کاله کېږي چې د افغانستان نجونو ته د ښوونځیو دروازې تړل شوې دي؛ څلور کاله چې پکې زرګونه خوبونه چوپ پاتې شوي، زرګونه کتابونه بند شوي او زرګونه هیلي په زړونو کې پټې شوې دي. دا یوازې یوه ساده تعطیلي نه ده، بلکې د یو روښانه لوري درېدنه ده.»
د طالبانو اداره پرته له دې چې څرګند وضاحت وړاندې کړي، د نجونو زدهکړې په منځنیو او لوړو ښوونځیو او همدارنګه پوهنتونونو کې درولې دي. سره له دې چې له دې پرېکړې څو کاله تېر شوي، لا هم د دغو تعلیمي مرکزونو د بیا پرانیستلو لپاره کوم عملي ګام نه دی پورته شوی — موضوع چې تل د کورني او نړیوال عکسالعمل سبب شوې ده.
اوس مهال افغانستان یوازینی هېواد په نړۍ کې دی چې د شپږم ټولګي پورته د نجونو زدهکړې په رسمي ډول منع دي؛ دا وضعیت د میلیونونو نجونو د زدهکړې او کاري راتلونکي په اړه جدي اندېښنې راپارولې دي.
