په فراه کې يو ځوان د فراهروډ په سيند کې ډوب شوی دی
سيمهييزې سرچينې په فراه ولايت کې تأييدوي چې يو ځوان د فراهروډ ولسوالۍ په يوه سيند کې له ډوبېدو وروسته خپل ژوند له لاسه ورکړی دی. د دغو سرچينو په وينا، تر د دې خبر د خپرېدو دمه لا هم د نوموړي جسد له اوبو نه دی راايستل شوی.
دغه پېښه د جمعې په ماسپښين، د حمل اوومه نېټه، د فراهروډ ولسوالۍ د «باغپل» په سيمه کې رامنځته شوې ده. د سيمې اوسېدونکو ويلي، دغه ځوان د اوبو د لوبې پر مهال سيند ته داخل شوی و چې ورپسې ډوب شوی دی.
تر اوسه د قرباني د هويت او د پېښې د دقيقو جزياتو په اړه نور معلومات نه دي خپاره شوي، خو سرچينې ټينګار کوي چې د جسد د موندلو هڅې دوام لري.
په وروستيو کلونو کې ورته پېښې په ګڼو ولايتونو کې څو ځله تکرار شوې دي. د سيندونو ترڅنګ د ابتدایي ژغورنې د تجهيزاتو نشتوالى او د طالبانو د ادارې لهخوا د مخنيوي د تدابيرو نه پاملرنه هغه عوامل بلل کېږي چې د دا ډول پېښو خطر زياتوي.
د بحران د مديريت کارپوهان څو ځل ټينګار کړی چې د خلکو، په ځانګړي ډول د ځوانانو، د پوهاوي د لوړولو او د ژغورنې د امکاناتو د برابرولو اړتيا ډېره ده؛ يوه هڅه چې کولی شي د دې ډول مرګونو پېښو د تکرار مخه ونيسي.
