مدوېدېف: د امريکا ځمکنۍ حمله پر ايران به له سختې ناکامۍ سره مخ شي
د روسيې د امنيتي شورا مرستيال ډېمېټري مدوېدېف خبرداری ورکړی چې که متحده ايالات پر ايران ځمکنۍ حمله وکړي، له «سختې او درنې ماتې» سره به مخامخ شي. نوموړي ټينګار کړی چې دا ډول اقدام به درانه لګښتونه او نه اټکل کېدونکي پايلې ولري.
مدوېدېف د تاريخي تجربو يادونه وکړه او ويې ويل، د ايران په خاوره کې د ځمکنۍ جګړې پيلول کولای شي امريکا د ويېتنام جګړې له وضعې سره ورته حالت ته ورسوي؛ هغه جګړه چې څو کاله اوږده شوه او د پام وړ تلفات او مالي زيانونه يې درلودل. د ده په وينا، د سيمې پېچلې جغرافيه او سياسي شرايط هر ډول پوځي عمليات ستونزمن او اوږدمهاله کوي.
د روسيې چارواکو له دې وړاندې هم د منځني ختيځ په اړه د هغه څه په هکله چې دوی يې «پوځي ماجراجويي» بولي، خبرداری ورکړی دی. هغوی ټينګار کړی چې د دې سيمې پوځي تنشونه کولای شي د سيمې او حتا د نړيوالې امنيت او ثبات لپاره جدي ننګونې رامنځته کړي.
