د نیول شوي خبریال ازادي؛ د افغانستان د رسنیو د وضعیت په اړه اندېښنې لاهم شته
د افغانستان د خبریالانو مرکز خبر ورکړی چې مهدي انصاري، هغه خبریال چې نیول شوی و، تېر ماښام (پنجشنبه) د طالبانو د ادارې له بند څخه آزاد شوی او خپل کورنۍ ته بېرته راګرځېدلی دی.
د دې ادارې د خبرپاڼې له مخې، ښاغلی انصاري د ۱۴۰۳ د میزان په ۱۴مه نېټه نیول شوی و. هغه وروسته د همدې کال د جدې په ۱۲مه د کابل لومړنۍ محکمې د طالبانو د ادارې پر ضد د «منفي تبلیغاتو» په تور په یو نیم کال بند محکوم کړی و.
د «منفي تبلیغاتو» تور په وروستیو کلونو کې څو ځله پر خبریالانو او د رسنیو فعالانو لګېدلی چې د خبرې آزادۍ او د خبریالانو د کاري خوندیتوب په اړه اندېښنې زیاتې کړي دي.
د افغانستان د خبریالانو مرکز زیاتوي چې د ۱۴۰۴ لمریز کال په ترڅ کې لږ تر لږه ۲۱ خبریالان د طالبانو له خوا نیول شوي، چې له هغوی څخه څلور تنه لا هم تر اوسه په بند کې دي. د رسنیو ملاتړي بنسټونه تل د خودسرې نیونې د ختمېدو او د خبریالانو د مسلکي خوندیتوب د تضمین غوښتنه کوي.
