د مصر او قطر هرکلی د پاکستان او د طالبانو د ادارې ترمنځ د اختر اوربند ته
مصر او قطر د پاکستان او د طالبانو د ادارې ترمنځ د کوچني اختر د موقتي اوربند له اعلان څخه هرکلی وکړ او دا يې د دواړو لورو ترمنځ د وروستیو کړکېچونو د کمېدو لپاره یو مثبت ګام وبللو؛ هغه کړکېچونه چې په تېرو اوونیو کې يې د پولو سیمو د ملکي وګړو د امنیت په اړه اندېښنې زیاتې کړې وې.
د نړیوالو رسنیو د راپور له مخې، د پنجشنبې په ورځ د مارچ په ۲۸مه، قاهرې دا اقدام د شخړو د کمولو لپاره د هڅو د بیا پيل مناسب فرصت وباله. مصري چارواکو ټینګار کړی چې د دغه ډول ګامونو دوام کولای شي د دواړو لورو ترمنځ د باور فضا رامنځته کړي او د دايمي اوربند د ترلاسه کولو لاره هواره کړي.
د مصر په باور، د جګړو دوام نه يوازې دا چې د ملکي وګړو ژوند له خطر سره مخ کوي، بلکې د سیمې ثبات هم زیانمنوي. له همدې امله، دغه هېواد غوښتنه کړې چې له رامنځته شوې موقع څخه په مؤثر ډول د تاوتریخوالی د کمولو لپاره ګټه واخيستل شي.
په ورته وخت کې د قطر د بهرنیو چارو وزارت په يوه اعلاميه کې ويلي چې موقتي اوربند کولای شي د خبرو لپاره ارام چاپېريال رامنځته کړي. دوحې هيله څرګنده کړې چې دا اقدام به د يوې دايمي هوکړې لامل شي؛ داسې هوکړه چې د ملکي خلکو ژوند خوندي کړي او د سيمې د امنيت او ثبات پياوړتيا ته مرسته ورسوي.
قطر همدارنګه د پاکستان او د طالبانو د ادارې له مثبت ځواب څخه هرکلی کړی، چې د دغه هېواد، سعودي عربستان او ترکيې له خوا د اوربند د غوښتنې په تړاو ورکړل شوی و. دوحې ټینګار کړی چې خبرې اترې او سوله ییز حل لارې د شخړو د حل تر ټولو اغېزمنه لاره ده.
قطر زياته کړې چې خپلې ديپلوماتیکې هڅې به د سیمه ییزو او نړیوالو شریکانو په همکارۍ د کړکېچ د کمولو او د بحران د لا پراختيا د مخنيوي لپاره روانې وساتي؛ هغه موضوع چې د سیمې د حساس وضعیت له امله ځانګړې اهميت لري.
