طالبانو د کوچني اختر په مناسبت له زندانونو د ۴۵۰۰ څخه ډېر بنديان آزاد کړي
سترې محکمې اعلان کړی چې د طالبانو د ادارې د مشرتابه په لارښوونه، د کوچني اختر په مناسبت په ټول هېواد کې ۴۵۹۶ بندیان له زندانونو آزاد شوي او د ۴۴۰۷ نورو زندانيانو د بند موده هم کمه شوې ده.
په هغه خبرپاڼه کې چې د چهارشنبې په ورځ خپره شوې، یادې ادارې ويلي چې د بندیانو د آزادېدو او د سزا د کمېدو بهیر د يو مشخص طرزالعمل له مخې او د اړوندو ادارو په همغږۍ عملي شوی دی. خو د دې زندانیانو د جرمونو نوعیت او د انتخاب معیارونو په اړه نور جزئیات نه دي خپاره شوي.
د مذهبي مناسبتونو په لړ کې د بندیانو آزادول په افغانستان کې پخوانی ساری لري او په بېلابېلو حکومتونو کې تر سره شوی دی. سره له دې، د بشري حقونو بنسټونه تل د دوسیو د څېړلو په بهیر کې د شفافیت او د قربانيانو د حقونو د رعایت غوښتنه کړې ده.
د طالبانو اداره تر اوسه د دې فرمان د عملي کېدو د څارنې او د آزاد شويو کسانو له خوا د جرمونو د نه تکرار د تضمين په اړه څرګند معلومات نه دي ورکړي؛ موضوع چې د ځينو شنونکو په باور، د اړوندو مسئولینو له لوري د لا ډېر وضاحت او حساب ورکونې غوښتنه کوي.
