راپورونه: امريکا او اسرایېل په وروستيو جګړو کې له زړو مهماتو زياته ګټه اخلي
څېړنيز راپورونه څرګندوي چې له نږدې شلو ورځو راهيسې د روانو جګړو له پيل وروسته، د ښکېلو لوريو د دفاعي او ځوابي وړتياوو کچه روښانه شوې او د مهماتو مصرف په پام وړ ډول زيات شوی دی. د دغو راپورونو له مخې، د امريکا او اسرایېل له ائتلاف څخه يوه د پام وړ برخه د خپلو توغنديو او بمونو زېرمه په وروستيو عملياتو کې کارولې ده.
په دفاعي برخه کې ويل کېږي چې د رهګير توغنديو او دفاعي تجهيزاتو زياته اندازه کارول شوې ده، او په تهاجمي برخه کې د جنګي الوتکو پراخ استعمال د هغو څارکو الوتکو ځای ناستې شوي چې د جګړې پر مهال ويجاړې شوې دي. يو شمېر پوځي شنونکي ادعا کوي چې د هوايي عملياتو په جوړښت کې بدلون د توغنديو او بمونو د زيات استعمال سبب شوی دی.
د رسنيو د څېړنو له مخې، تر دې دمه له ۳۰۰ څخه زيات توغندي او بمونه کار نه دي ورکړي او نه دي چاودېدلي. په دغو مهماتو کې د «MK-80» کورنۍ بېلابېل ډول بمونه، د «Tomahawk» کروز توغندي او د «AGM-158 JASSM» توغندي شامل دي.
په ځينو راپورونو کې د دغو مهماتو د نه چاودېدو احتمالي لامل، د چاودنې فيوزونو تخنيکي ستونزې يا د برېښنايي جګړې اغېز بلل شوی، خو دا ادعاوې تر اوسه په خپلواکه توګه نه دي تائيد شوې. د ټولنيزو شبکو خپرې شوې انځورونه هم ښيي چې د دغو مرميو د جوړېدو نيټه د ۲۰۱۳ او ۲۰۱۴ کلونو پورې اړوند ده.
ځينې پوځي ناظران باور لري چې د جګړې اوږدېدل او د پرمختللو مهماتو زيات استعمال ښايي لامل شوی وي چې ښکېل لوري له پخوانيو زېرمو څخه هم کار واخلي. تر اوسه د امريکا او اسرایېل رسمي چارواکو په دې اړه څرګندې څرګندونې نه دي کړې.
همداراز، د هغو بمونو او توغنديو انځورونه چې کار نه دي ورکړي او یا يې ملکي سيمې لګېدلي، په ټولنيزو شبکو کې پراخ غبرګونونه راوپارول او د بريدونو د دقت او اغېزو په اړه بحثونه يې راپورته کړي دي.
