حميدي: پر کابل کې د اعتیاد درملنې پر مرکز برید کېدای شي د نړیوال جزایي محکمې د څېړنې وړ وي
محمد فريد حميدي، د افغانستان د پخواني حکومت لوی څارنوال، ويلي چې د پاکستان لخوا پر کابل ښار کې د اعتیاد د درملنې پر مرکز برید کېدای شي د نړیوال جزایي محکمې د صلاحیتونو په چوکاټ کې وڅېړل شي. نوموړي دا کار د نړیوالو قوانينو له نظره یو احتمالي «د جګړې جنایت» بللی دی.
حميدي د سهشنبې په ورځ، د حوت ۲۶مه، په خپل ایکس پاڼه کې لیکلي چې که د داسې ملکي تاسیساتو هدف ګرځول ثابته شي، نو دا عمل د نړیوالو جنایي جرمونو په تعریف کې راځي. د ده په وینا، پر هغو درملیزو مرکزونو برید چې ملکي بڼه لري، د نړیوال بشردوستانه قانون له مخې په کلکه منع دي.
پخواني لوی څارنوال ټینګار کړی چې که څه هم د طالبانو اداره د افغانستان غړیتوب د نړیوال جزایي محکمې سره نه مني، خو دغه ډله نه ملي او نه هم نړیوال مشروعیت لري، او د هغوی پرېکړه د افغانستان حقوقي وضعیت نه شي بدلولی. د ده په وینا، افغانستان لاهم د روم د اساسنامې غړی دی او اړوند قانوني مکلفیتونه یې پر ځای پاتې دي.
حميدي د روم د اساسنامې په اړه زیاته کړې چې نړیوال جزایي محکمه صلاحیت لري چې د جګړې جنایتونه، د بشريت ضد جرمونه، نسل وژنه او د تېري جرمونه وڅېړي. هغه څرګنده کړې چې پر استوګنې ځایونو بریدونه، د ملکي کسانو تلفات، او د روغتونونو، ښوونځیو او نورو خوندي ځایونو بمبار، که ثابته شي، د جګړې جنایتونه او حتی د بشريت ضد جرمونه ګڼل کېدای شي.
دا څرګندونې په داسې حال کې کېږي چې د طالبانو اداره د روان لمریز کال په پیل کې، وروسته له هغې چې نړیوالې جزایي محکمې د دې ډلې د مشر د نیولو حکم صادر کړ، اعلان وکړ چې دا تړونونه نه مني. سره له دې، حقوقپوهانو څو ځل ټینګار کړی چې د یوې نامشروع ادارې له خوا د تړونونو نه منل یا یو اړخیز وتل، د یوه هېواد نړیوال تعهدات په اتومات ډول نه لغوه کوي.
