د برتانيې صدراعظم: زموږ هېواد به د ايران جګړې ته داخل نه شي
د برتانيې صدراعظم ويلي چې هېواد به يې له ايران سره جګړې ته داخل نه شي، خو د هرمز تنګي د اوسني حالت د سمېدو لپاره به خپلې ديپلماتيکې هڅې دوام ورکړي. هغه ومنله چې د دې ستراتيژيک دهلېز بېرته پرانيستل آسانه کار نه دی.
کېر ستارمر ټينګار وکړ چې له جګړې وروسته به له ايران سره د خبرو او يوه ډول موافقې ته د رسېدو اړتيا وي. د ده په وينا، دوامدار حل يوازې د خبرو له لارې ترلاسه کېدای شي.
هرمز تنګی د نړۍ د انرژۍ د لېږد يو له مهمو لارو څخه ګڼل کېږي او هر ډول تاوتريخوالی پکې د نړيوال اقتصادي او امنيتي اغېز لامل کېدای شي.
برتانيې له امريکا متحدانو سره يو ځای د ډونالډ ټرمپ، د امريکا د ولسمشر، هغه غوښتنه رد کړې چې د هرمز تنګي په بېرته پرانيستلو کې دې مرسته وکړي.
سره له دې، د برتانيې صدراعظم د خپل هېواد د رول شتون هم تأييد کړ او ويې ويل چې د دوی زرګونه سرتېري په قبرس کې مېشت دي او درې برتانوي جنګي الوتکې هڅه کوي هغه بريدونه وڅاري چې ايران ته منسوب بلل کېږي.
