د پاکستان هوايي بريدونه پر کابل؛ د ملکي وګړو د درنو تلفاتو راپورونه خپاره شول
د فرانس پرېس خبري آژانس د سهشنبې په سحر د کب پر ۲۶مه راپور ورکړی چې د پاکستان د هوايي بريدونو له کبله پر کابل ښار د ملکي وګړو د زياتو تلفاتو اندېښنې ډېرې شوې دي. د طالبانو د ادارې چارواکو ويلي چې د کابل ختيځ ته د روږدو کسانو يو لوی درملنې مرکز هدف ګرځول شوی او د دې بريد له امله سلګونه کسان وژل شوي يا ټپيان شوي دي.
د طالبانو د ادارې د مرستیال وياند په وينا، په هغه بريد کې چې د روږدو کسانو پر دوه زره بستره روغتون ترسره شو، لږ تر لږه ۴۰۰ کسان وژل شوي او ۲۵۰ نور ټپيان دي، خو دا امکان هم شته چې د تلفاتو شمېر زيات شي. له دې وړاندې د طالبانو تر ادارې لاندې د عامې روغتيا وزارت له ۲۰۰ څخه د ډېرو وژل شويو او ټپيانو راپور ورکړی و، چې دا د ورکړل شويو شمېرو تر منځ د توپير ښکارندويي کوي.
ذبيحالله مجاهد، د طالبانو د ادارې وياند، دغه بريد «د افغانستان د حاکميت نقض» او «غير انساني» بللی او په کلکه يې غندلی دی. نوموړي ويلي چې د قربانيانو ډېری برخه ملکي وګړي دي، په ځانګړي ډول هغه معتادان چې تر درملنې لاندې وو.
په مقابل کې، د پاکستان چارواکو په لوی لاس د ملکي وګړو هدف ګرځول رد کړي او ويلي دي چې بريدونه د «نظامي تاسيساتو او ترهګريزو زيربناوو» پر ضد متمرکز وو. اسلاماباد تر اوسه د کابل د يوې درملنې مرکز د هدف ګرځولو په اړه نور جزئيات نه دي وړاندې کړي.
دغه پېښه د دواړو خواوو تر منځ د پولهييزو نښتو او تاوتريخوالي د زياتوالي په لړ کې رامنځته شوې ده؛ تاوتريخوالی چې له تېرو مياشتو راهيسې شدت موندلی دی. د ملګرو ملتونو سازمان تر دې مخکې ويلي وو چې له فبرورۍ راپدېخوا لږ تر لږه ۷۵ ملکي وګړي د دې نښتو له امله وژل شوي دي.
د ملکي تلفاتو د زياتوالي له امله تمه کېږي چې نړيوال بنسټونه به د بشري حقونو د مراعت او د ملکي سيمو د خونديتوب په اړه خپلواکې څېړنې ترسره کړي؛ موضوع چې تل د سيمهييزو شخړو پر مهال پرې ټينګار شوی دی.
