د پکتيا–خوست د ۴۴ کيلومتره سړک د بيا رغونې کار پيل شو
د خوست د عامه ګټو رياست ويلي چې د پکتيا–خوست د شاهراه نږدې ۴۴ کيلومتره د بيا رغونې چارې پيل شوې دي او تمه ده چې دا پروژه په څلورو مياشتو کې بشپړه شي. د دې سړک برخه د مټهچينه کانکريټي پل څخه تر د سيدخېل سيمې تر پله پورې غځېدلې ده.
د دې رياست د چارواکو په وينا، د پروژې د پلي کولو لګښت شاوخوا ۲۰ ميليونه افغانۍ اټکل شوی او موخه يې د سړک د کيفيت ښه والی، د ترافيکي خونديتوب زياتوالی او د اقتصادي فعاليتونو ملاتړ ښودل شوی دی.
د پکتيا–خوست شاهراه د هېواد په جنوب ختيځ کې له مهمو ترانزيتي لارو شمېرل کېږي، چې د سيمې اوسېدونکي يې د ورځني تګ راتګ او د تجارتي توکو د لېږد لپاره کاروي. د دې لارې خرابوالی په تېرو کلونو کې د خلکو د تګ راتګ او د مالونو د انتقال لپاره جدي ستونزې رامنځته کړې وې.
په داسې حال کې چې د طالبانو اداره وايي د پروژې له بشپړېدو وروسته به د تګ راتګ ستونزې راکمې شي، د سيمې اوسېدونکي پر روڼ نظارت، د معیاري پروژو پر تطبيق او د ولايتي سړکونو پر دوامدار پاملرنه ټينګار کوي؛ ځکه چې په ځينو ولايتونو کې د زېربنايي پروژو د کيفيت او د اجرا د ځنډ ستونزې مخکې هم شته وې.
