په بلخ ولایت کې د ترافيکي پېښې له امله درې کسان مړه او څلور ټپيان شول
د بلخ د طالبانو د ادارې چارواکي وايي، د مزارشريف–جوزجان پر لويه لاره د درې موټرو د ټکر له امله درې تنه مړه او څلور نور ټپيان شوي دي. دا پېښه د شنبې په ورځ، د حوت ۲۳مه، د چاربولک ولسوالۍ په اړونده سيمه کې رامنځته شوې ده.
محمد عيسی وثيق، د بلخ د طالبانو د امنيې قوماندانۍ وياند، ويلي چې دا پېښه د درې عرادو موټرو د ټکر له امله رامنځته شوې او د قربانيانو په منځ کې يو ماشوم هم شامل دی.
د ده په وينا، ټپيان د پېښې له رامنځته کېدو وروسته د مرستندوی ټيمونو له خوا روغتون ته انتقال شوي، خو د دوی د روغتيايي حالت په اړه نور جزئيات نه دي ورکړل شوي.
په هېواد کې د ترافيکي پېښو لړۍ تل له خلکو قرباني اخلي. د چلوونکو بېاحتیاطي، د لارو خرابوالی او د اغېزمنې ترافيکي څارنې نشتوالی هغه عوامل دي چې د هېوادوالو ژوند ګواښي؛ دا يو موضوع ده چې خلکو څو ځله له د طالبانو ادارې غوښتي، څو د دې وضعيت د ښه مديريت لپاره عملي او مسؤلانه اقدامات وکړي.
