په پنجشېر کې دوه پرلپسې چاودنو د طالبانو موټر ولګاوه
د پنجشېر ولايت له ولسي سرچينو څخه راپور ورکول شوی چې پرون ماښام (سهشنبه د عقرب شپږمه نېټه) د رُخه ولسوالۍ د «تندی خواجه» په سيمه کې دوه پرلپسې چاودنې شوې دي. د دغو سرچينو په وينا، شاوخوا د ماښام اووه بجې دوه شدیدې چاودنې واورېدل شوې چې ښکاري د طالبانو د ادارې یو نظامي موټر يې هدف ګرځولی وي.
سرچینې زياته کړې چې تر چاودنو لږه شېبه وروسته له سيمې د ډزو غږونه هم اوريدل شوي او د سيمې امنيتي حالت په څرګند ډول خراب شوی دی. طالبانو له هغې وروسته د پېښې ځای په بشپړ ډول کلابند کړی او ټولې غځېدلې لارې يې تړلي دي.
تر دې دمه د دې پېښې د احتمالي تلفاتو او زيانونو رسمي مالومات نهدي خپاره شوي، خو ځایي سرچینې وایي چې تر برید وروسته سيمې ته ګڼ شمېر امبولانسونه او د اور وژنې موټرونه رسېدلي، چې ښايي د مرګژوبلې امکان پياوړی کړي.
تر دې دمه د طالبانو ادارې د دغو چاودنو په اړه رسمي غبرګون نه دی ښودلی. پنجشېر ولايت په تېرو څه باندې يو نيم کال کې د طالبانو پر ضد د يو شمېر وسله والو عملياتو او نښتو شاهد و، او دا ډول پېښې د دې ولايت د بېثباته وضعيت دوام ته اشاره کوي.
