د ایران څخه د نږدې دوو میلیونو افغانانو راستنېدل؛ د بېکارۍ کړکېچ رامنځته کېږي
د ملګرو ملتونو د کډوالو چارو عالي کمېشنرۍ (UNHCR) اعلان کړی چې په تېرو دولسو میاشتو کې نږدې دوه میلیونه افغانان له ایرانه هېواد ته ستانه شوي دي. دغه بهیر د افغانستان د کورنیو کوربنو ټولنو او د لومړنیو خدماتو پر نظام پراخ فشار راوستی دی.
د دې ادارې د معلوماتو له مخې، ډېری ستانه شوي کسان د هېواد له پولې د ننوتو پر مهال د دوامدارو کارموندنې فرصتونو نشتون د خپلو مهمو ننګونو په توګه یادوي. د پایدارو معاشي فرصتونو رامنځته کول، په ځانګړي ډول د ښځو لپاره، له هغو بنسټیزو اړتیاوو څخه دي چې نوې ستانه شوې ډلې پرې ټینګار کوي او ملګري ملتونه هم دا موضوع د خپلو برنامو په لومړیتوبونو کې نیولې ده.
د مهاجرینو دا پراخ راستنېدنه داسې مهال رامنځته کېږي چې د افغانستان اقتصاد له سختو محدودیتونو، د کار د موقعو له کموالي او له زیاتېدونکي فقر سره مخ دی. له دې سره، د طالبانو د ادارې له لوري پر دندو او ټولنیزو فعالیتونو د ښځو محدودیتونه د ښځو لپاره د عایداتي فرصتونو موندل لا ستونزمن کړي او د هغو ښځو د راتلونکې په اړه اندېښنې ډېرې کړي چې د کورنۍ سرپرستۍ پر غاړه لري.
افغانستان په تېرو څلورو لسیزو کې په سیمه کې د مهاجرینو له سترو نفوسونو څخه ګڼل شوی. اوس، له دې سره چې د بېرته راستنېدو لړۍ چټکه شوې، د منظمې دندې برابرولو، مسلکي روزنو او د وړو کاروبارونو د ملاتړ اړتیا، په ځانګړي ډول په زیانمنو سیمو کې، تر هر وخت ډېره احساسېږي.
