د افغانستان او پاکستان ترمنځ د پولو تازه شخړې؛ د هاوان مرمیو له امله درې کسان وژل شوي
د افغانستان او پاکستان ترمنځ د پولو تازه تاوتریخوالی له امله د پاکستاني ځواکونو له لوري په پکتیا، پکتیکا، خوست او نورستان ولایتونو کې د هاوان او توپونو سلګونه مرمۍ لګېدلې دي. د راپورونو له مخې، په دغو بریدونو کې درې ملکي کسان وژل شوي، درې تنه ټپیان دي او لسګونه کورنۍ اړې شوې چې خپل کورونه پرېږدي. دا پېښې د تېرو ۲۴ ساعتونو په موده کې رامنځته شوې دي.
د طالبانو د حکومت د ویاند مرستیال ملا حمدالله فطرت ویلي، دغه بریدونه د یادو ولایتونو په څو ولسوالیو کې شوي دي. د ده په وینا، د سهشنبې ماښام یو د هاوان مرمۍ د پکتیا ولایت د دندپټان ولسوالۍ د کوټ کلي ته لګېدلی، چې له امله یې لږ تر لږه درې ولسي وګړي وژل شوي او دوه تنه ټپیان شوي دي.
فطرت زیاته کړې، د پکتیا ولایت د شکېن ولسوالۍ په ګډون د ۱۲ هاوان او ۱۴ د توپ مرمۍ د استوګنې پر سیمو او عامه تاسیساتو لګېدلې دي. ده ویلي، ډېری دغه مرمۍ پر شاړو ځمکو، پرېښوودل شوو کورونو او د ولسوالۍ د امنیې قوماندانۍ شاوخوا لګېدلې دي او د انسانانو د وژل کېدو راپور نهدی ورکړل شوی.
په ورته وخت کې، شاوخوا ۹۰ د هاوان او توپ مرمۍ د پکتیکا ولایت د برمل ولسوالۍ پر بېلابېلو برخو توغول شوې دي. د خوست ولایت د زازي میدان ولسوالۍ کې هم د درنو وسلو بریدونو د استوګنې کورونه په نښه کړي، چې له امله یې یو کس ټپي شوی او ګڼې کورنۍ بېځایه شوې دي.
د نورستان ولایت د کامدیش ولسوالۍ په څو کلیو کې هم د توپونو او هاوانونو بریدونه شوي، چې د سیمې اوسېدونکي یې اړ کړي څو خپل کورونه پرېږدي. د ورکړل شوو شمېرو له مخې، په دغه بریدونو کې یو شمېر کورونه نیمه ویجاړ شوي او شاوخوا ۲۰ سرې څاروی هم وژل شوي دي.
د دغو دوامدارو سرحدي بریدونو له امله د افغانستان او پاکستان د پولو دواړو غاړو کې د ملکي وګړو د خوندیتوب په اړه جدي اندېښنې رامنځته شوې دي. سره له دې چې د طالبانو اداره د خلکو د امنیت او ژوند د خوندیتوب مسؤلیت په غاړه لري، د دې ډول پېښو تکرار دا پوښتنه راولاړوي چې د سرحدي شخړو د مدیریت او د ملکي وګړو د ساتنې لپاره څه ډول تګلارې پلي کېږي.
