په ویانا کې د افغان نجونو د زده کړو د بندیز پر اغېزو غونډه جوړه شوه
د افغانستان سفارت او دایمي استازولۍ په ویانا کې اعلان کړی چې د فینلنډ په همکارۍ یې یوه غونډه د افغانستان د نجونو د زده کړو د بندیز اوږدمهالو اغېزو په اړه جوړه کړې ده. دا غونډه د منیژه باختري، په اتریش کې د افغانستان د سفیرې، تر مشرۍ لاندې او د «د آسیايي شریکانو د همکارۍ ګروپ» په چوکاټ کې ترسره شوې ده.
په دې ناسته کې د ملګرو ملتونو د بشري حقونو د شورا ځانګړي راپور ورکوونکي ریچارد بېنېټ او د ښځو د حقونو فعاله میرا مهران هم ګډون کړی وو. ګډونوالو د افغان نجونو او ښځو د زده کړو له منع کولو پراخې اغېزې وڅېړلې او پرې یې ټینګار وکړ.
په غونډه کې څرګنده شوه چې د نجونو او ښځو منظم څنډې ته کول د زده کړو له نظام څخه نه یوازې د بشري حقونو جدي سرغړونه ده، بلکې دا یو جوړښتي چلینج هم دی چې د افغانستان ثبات، پرمختګ او سیمهییز امنیت د اوږدمهال لپاره له ګواښ سره مخ کوي. د ګډونوالو په باور، که دا حالت دوام ومومي، نو ټولنیز او اقتصادي واټنونه به لا ژور شي.
منیژه باختري ټینګار وکړ چې افغانستان هغه وخت ثبات او دوامداره هوساینه ترلاسه کولی شي چې ټول وګړي، په ځانګړې توګه ښځې او نجونې، د زده کړو له حقه برخمنې وي. دا په داسې حال کې ده چې د طالبانو اداره د زده کړو د محدودیتونو په دوام سره میلیونونه نجونې له منځني او لوړو زده کړو بې برخې کړې دي او له پراخو کورنیو او نړیوالو نیوکو سره مخ ده.
