لندن خبرداری ورکړ: د ایران له دوامدار کړکېچ سره به د برېتانیا اقتصاد زیان وویني
د برېتانیا لومړي وزیر ویلي چې د امریکا او اسراییلو تر منځ له ایران سره دوامداره نظامي نښتې د ده د هېواد پر اقتصاد منفي اغېزه لرلای شي. هغه ټینګار وکړ چې د برېتانیا حکومت د دې بحران بېلابېل اړخونه او احتمالي خطرونه ارزوي.
کییر ستارمر وويل، لندن له خپلو نړیوالو شریکانو سره په تماس کې ده څو د دې وضعیت د اغېزو د کمولو لپاره ګډه تګلاره رامنځته کړي. د ده په وینا، موخه دا ده چې د وروستیو بدلونونو اغېز پر خلکو او سوداګریزو برخو تر ممکنه حده کنټرول شي.
ستارمر زیاته کړه، د حکومت مسوولیت دا دی چې د وضعیت پرمختګونه په وخت تعقیب کړي او له نورو هېوادونو سره په همغږۍ د بېلابېلو سناریوګانو لپاره چمتووالی ولري. نوموړي خبرداری ورکړ چې هر څومره دا وضعیت وغځېږي، دومره به د برېتانیا پر اقتصاد، وګړو او د کار پر فرصتونو یې اغېز زیات شي.
په همدې حال کې، د ګارډین ورځپاڼې مخکې راپور ورکړی و چې د نفت او ګازو د بیو د لوړېدو له امله اقتصادپوهان د جګړې د دوام پر پایلو اندېښنه لري. د دغه راپور له مخې، که کړکېچ دوام وکړي، د پخوانیو اقتصادي ودهيي وړاندوینو بیاکتنه کېدای شي.
لارد جیم اونیل، چې د ګولډمن ساکس اقتصادپوه دی، ویلي چې د امریکا سپينې ماڼۍ د ایران له جګړې سره اړوند ژیوپولیټیکي اړخونو ته کافي پاملرنه نه ده کړې. دا څرګندونې په داسې حال کې شوي چې د انرژۍ نړیوال بازارونه د سیمهییزو بدلونونو په وړاندې غبرګون ښيي.
