جاپان له ايران، امريکا او اسرایيلو د ژر د تنشونو د کمېدو غوښتنه وکړه
د جاپان د بهرنيو چارو وزير د ايران له خپل سيال سره په يوه تليفوني خبرو کې د ايران، امريکا او اسرایيلو ترمنځ د تنشونو د ژر کمېدو او د نښتو د درولو غوښتنه وکړه. د توکيو حکومت ويلي چې د روان حالت دوام کېدای شي د سيمې ثبات نور هم کمزوری کړي.
د کيودو خبري اژانس د رپوټ له مخې، د جاپان د بهرنيو چارو وزير توشيميتسو موتګي د دوشنبې په ورځ د ايران له بهرنيو چارو وزير سيد عباس عراقچي سره د سيمې د وروستيو بدلونونو په اړه خبرې کړې دي. په دې تماس کې د جګړې د پراخېدو د مخنيوي پر اړتيا ټينګار شوی دی.
په هغه اعلاميه کې چې د توکيو له خوا خپره شوې، ويل شوي چې د ايران، امريکا او اسرایيلو ترمنځ دوامدارې نښتې د سيمې وضعه نوره هم خرابوي او د ثبات او امنيت په اړه اندېښنې زياتوي. د جاپان د بهرنيو چارو وزير په دې اعلاميه کې د تنشونو د ژر راکمېدو غوښتنه کړې ده.
د جاپان حکومت همدارنګه ويلي چې د ايران اړوند مسلو د حل لپاره به له نړيوالې ټولنې سره همکاري وکړي او اړين ديپلوماتيک هڅې به دوام ورکړي. جاپان تل د سيمه ييزو کړکېچونو په مديريت کې د خبرو اترو او سياسي لارو د کارولو پر اهمیت ټينګار کړی دی.
