ټولنهیزمهم خبرونه
د هېواد په ۲۳ ولایتونو کې د واورې او باران د ورېدو وړاندوینه شوې
د طالبانو د ترانسپورټ او هوايي چلند وزارت د هواپېژندنې ریاست اعلان کړی چې سبا به د هېواد په ۲۳ ولایتونو کې د واورې، باران، تندر او نسبتاً شدید بادونو د ورېدو احتمال وي.
د دې وړاندوینې له مخې، د کابل، لغمان، کنړ، کاپیسا، پنجشیر، هرات، بادغیس او بدخشان ولایتونه د یاد شوي خبرداري لاندې راځي. همدارنګه ویل شوي چې یو شمېر نور ولایتونه هم له ورته هوايي بدلونونو سره مخ کېدلی شي.
د هواپېژندنې ریاست له هغو کسانو څخه چې په دغو سیمو کې اوسېږي، غوښتنه کړې چې د باران او باد د احتمالي شدت له امله د ښار دننه تګ راتګ او بینالولایتي سفرونو پر مهال د احتیاط تدابیر په پام کې ونیسي.
په ژمي او د پسرلي په لومړیو میاشتو کې، په هېواد کې د ځینو غرنیو سیمو لپاره ناڅاپي بارانونه او تندر عادي دي چې کله ناکله د ترافیکي ستونزو او د لویو لارو د بندېدو لامل ګرځي.
