په ننګرهار کې د ټرافیکي پېښې له امله یو کس وژل شوی او څلور تنه ټپیان دي
د طالبانو د ننګرهار امنیه قوماندانۍ ویلي، د بټيکوټ ولسوالۍ په یوه ټرافیکي پېښه کې یو تن وژل شوی او څلور تنه نور ټپیان شوي دي.
د دغه قوماندانۍ د معلوماتو له مخې، پېښه د یکشنبې په ناوخته، د حوت پر ۱۷مه، د «سپینخور» په سیمه کې د جلالاباد–تورخم په لویه لاره کې رامنځته شوې ده. دا لویه لاره د هېواد په ختیځ کې له ګڼېګوڼې ډکو او مهمو ترانزیټي لارو څخه ګڼل کېږي.
مسوولینو ویلي، ټپیان د درملنې لپاره د ننګرهار ولایتي روغتون ته لېږدول شوي دي، خو د دوی د روغتیايي حالت په اړه نور جزئیات نه دي ورکړل شوي.
په افغانستان کې هر کال ټرافیکي پېښې د سلګونو کسانو ژوند اخلي او ګڼ نور ټپي کوي. د موټر چلوونکو بېاحتیاطي، د سړکونو خرابوالی او د ټرافیکي نښو نشتوالی د دې پېښو اصلي لاملونه بلل کېږي. دا یوه هغه ستونزه ده چې د سړکونو د خوندیتوب د ښهوالي او د تلفاتو د کمولو لپاره د طالبانو د ادارې جدي پاملرنې او عملي اقداماتو ته اړتیا لري.
