په غزني کې د يو لوی تفريحي او سوداګریز مجتمع د جوړېدو کار پيل شو
د غزني ولايت د مرکز په روضه کوتل سيمه کې د شاوخوا ۲.۵ ميليونه ډالرو په ارزښت د يو ستر تفريحي او سوداګریز مجتمع د جوړولو چارې رسمي پيل شوې دي. د سيمه ييزو چارواکو په وينا، دا پروژه به په نږدې لس جريبه ځمکه تطبيق شي.
د ورکړل شويو معلوماتو له مخې، په دغه مجتمع کې به جومات، تېل پمپ، هوټل، شنې ساحې، د خوراکي او غير خوراکي توکو دوکانونه، د وسایلو ترميم ورکشاپ او د موټرو د تمېدو پراخ ځایونه جوړ شي.
د طالبانو د ادارې چارواکو په غزني کې د دې پروژې موخه د ښاري اسانتياوو رامنځته کول او د کار موندنې فرصتونه برابرول بللي دي. خو تر اوسه د پروژې د بشپړېدو دقيق وخت او د بوديجې د لګښت د څارنې څرنګوالي په اړه جزئيات نه دي ورکړل شوي.
غزني د هېواد له مهمو سوېل ختيځو ولايتونو څخه شمېرل کېږي، او د زيربنايي او سوداګريزو پروژو پلي کېدل په دې ولايت کې کولای شي د اقتصادي فعاليتونو پر وده او د ښاري خدمتونو پر ښه والي مثبته اغېزه ولري، په دې شرط چې د تطبيق بهير يې روڼ او د حساب ورکولو وړ وي.
