ايران د انرژۍ پر زيربناوو بريدونه د بشريت پر ضد جنايت وبلل
د ايران د بهرنیو چارو وزارت وياند اعلان کړی چې پر دې هېواد د انرژۍ پر زيربناوو بريدونه د «بشريت پر ضد جنايت» ګڼي. اسماعيل بقایي په خپله ټولنيزه شبکه ایکس کې ليکلي چې دغه بريدونه د سون توکو د زېرمه تاسيساتو، د هېواد د وګړو او چاپېريال ژوند له جدي ګواښ سره مخ کړی دی.
هغه ويلي، د سون توکو پر ګودامونو بريد د زهرجنو او خطرناکو موادو خپرېدو لامل شوی او دا موضوع کولای شي د ميليونونو کسانو روغتيا ته زيان ورسوي. د ده په وينا، د دې پېښې چاپېريالي اغېزې ممکن د ايران له پولو هم واوړي.
د ايران د بهرنیو چارو وزارت وياند دغه بريدونه يو وخت «د جګړې جنايت»، «د بشريت پر ضد جنايت» او «نسل وژنه» بللې دي. هغه ټينګار کړی چې دا ډول کړنې پراخې انساني او چاپېريالي پايلې لرلای شي.
تر اوسه د تلفاتو د کچې يا د تورنو خواوو د رسمي غبرګون په اړه نور جزئيات نه دي خپاره شوي.
