په بدخشان ولايت کې د درواز اوسېدونکو د پاکستان وروستي بريدونه وغندل
د بدخشان ولايت د درواز د پنځو ولسواليو اوسېدونکو د يوې پراخې غونډې په ترڅ کې د هېواد له امنيتي او دفاعي ځواکونو سره خپل ملاتړ اعلان کړ او د پاکستان وروستي بريدونه پر د افغانستان ځينو برخو وغندل. ګډون کوونکو ټينګار وکړ چې د ملي حاکميت او ځمکنۍ بشپړتيا دفاع د هر وګړي ګډ مسووليت دی او افغانان په اوسني حساس پړاو کې د خپلو امنيتي ځواکونو ترڅنګ ولاړ دي. د غونډې د تنظيم کوونکو په وينا، دا ولسي حرکت د هغو ملاتړونو د دوام په توګه ترسره شو چې په تيرو ورځو کې د هېواد په يو شمېر ولايتونو کې هم تنظيم شوي وو. درواز د بدخشان په شمال ختيځ کې د تاجکستان پر پوله پروت دی او اوسېدونکي يې وايي، سره له دې چې له مرکز څخه ليرې موقعيت لري، خو د هېواد د امنيتي بدلونونو پر وړاندې ځان مسوول ګڼي او چمتو دي چې د قانون په چوکاټ کې د افغانستان د ځمکنۍ بشپړتيا د ساتنې لپاره هر ډول همکاري وکړي.
