ایمل ولي خان: د دوه مخي تګلارې له امله د پاکستان پر ضد د تروریزم مبارزه زیانمنه شوې
ایمل ولي خان، چې د عوامي نشنل ګوند مشر دی په خیبر پښتونخوا ایالت کې، یو ځل بیا د پاکستان تېرو او اوسنیو پالیسیو ته د تروریزم په اړه نیوکه وکړه او خبرداری یې ورکړ چې د دوه مخي سیاست دوام به درانه زیانونه ولري. هغه ټینګار وکړ، که د تروریزم پر ضد روښانه او بې امتیازه دریځ ونه نیول شي، نو تاریخ به د ټولو اړخونو د کړنو په اړه قضاوت وکړي.
ایمل ولي خان وویل، له ۲۰۲۱ کال تر ۲۰۲۶ پورې یې پرلهپسې خبرداری ورکړی چې باید د افغانستان د «دوست حکومت» د راتګ په تمه د سیاست پر بنسټ پرېکړې و نه شي. د هغه په وینا، تجربه ښودلې چې دا ډول محاسبې نه یوازې امنیت نه راوړي، بلکې وضعیت لا پسې پېچلی کوي.
هغه څرګنده کړه: «ترهګر هېڅکله دوست نه شي کېدای؛ ترهګر یوازې ترهګر دی.» د ده په وینا، هغه ډلې چې پخوا د «ستراتېژیک ژوروالی» او یا «دوست» په نوم یادېدې، نن د پوځي عملیاتو هدف ګرځېدلي دي، او دا بدلون د پخوانیو ناپایدارو پالیسیو پایله ده.
د عوامي نشنل ګوند مشر زیاته کړه چې د ایدیالوژیکو اړیکو او لنډمهاله ګټو پر بنسټ تګلارې د پاکستان خلکو او دولت ته تر ټولو ډېر زیان رسولی دی. ده وویل، د دغو تګلارو له امله یو شمېر وګړي بېځایه شوي، بازارونه زیانمن شوي او ځوانان د ناامنۍ او بېسرنوشتی تر منځ ژوند تېروي.
ایمل ولي خان ټینګار وکړ چې د پاکستان د حکومت مسؤلیت یوازې د اعلامیو خپرول نه دي، بلکې اړتیا ده چې د تروریزم پر ضد ثابتې او اوږدمهاله تګلارې غوره شي. هغه څرګنده کړه، ترهګر نه دین لري او نه قوم، نو ځکه ورسره مبارزه باید بېشرطه، قاطع او له هر ډول امتیاز ورکولو پرته وي.
