د طالبان ادارې د پاکستاني پوځ د ۳۰ سرتېرو د وژل کېدو ادعا وکړه
د طالبانو د دفاع وزارت ويلي، د «ردالظلم» په نوم د عملياتو په دوام کې د دغه ادارې ځواکونو د پاکستان پوځ يوه پوسته د اصطلاحاً ديورند کرښې هاخوا، د کندهار ولایت د شورابک ولسوالۍ ترڅنګ په نښه کړې ده. دغه وزارت ادعا کړې چې د دې برید په نتيجه کې ۳۰ پاکستاني سرتېري وژل شوي دي.
په يو خبرپاڼه کې چې د ياد وزارت له لوري خپره شوې، ويل شوي چې د بشري تلفاتو تر څنګ يو شمېر وسلې او نظامي تجهيزات هم د طالبانو ادارې ځواکونو ته ورغلي دي. د دې راپور له مخې، دوه ميله هاوان، درې ميله «دوشکه» درنې وسلې، دوه دستګاوې د شپې او ورځې ليد، او دوه درنې وسلې د ترلاسه شوو تجهيزاتو په توګه یاده شوې دي.
همدارنګه په خبرپاڼه کې ويل شوي چې ۱۸ دانه لاسبمونه، ۳۰ فیره د درنو وسلو مرمۍ، ۱۰ بکسونه د دوشکې مرمۍ او يو شمېر نور مهمات د «جنګي غنيمت» په توګه ترلاسه شوي دي.
تر د دې خبر د خپرېدو د مهاله، د پاکستان چارواکو د دې ادعا په اړه هېڅ غبرګون نه دی ښوولی. په وروستيو کلونو کې د ديورند کرښې په اوږدو کې نښتو څو ځله د دواړو غاړو تر منځ د کړکېچونو د زياتېدو سبب شوی او د سرحدي سيمو اوسېدونکي یې اندېښمن کړي دي.
