د پخواني پينټاګون مشاور: له ايران سره جګړه به پر امريکا پوځي او اقتصادي فشارونه زيات کړي
داګلاس مکګرېګور، د امريکا د دفاع وزارت پخواني مشاور (پينټاګون) ويلي چې که له ايران سره نښتې دوام ومومي، متحده ايالات به له پراخو پوځي او اقتصادي پايلو سره مخ شي او په پای کې به اړ شي چې له منځني ختيځ څخه ووځي. نوموړي دا حالت د يوې اوږدمهالې سيمهييزې جګړې پيل وباله چې په وينا يې اغېز به يې له سيمې هاخوا هم محسوس وي.
مکګرېګور په يوې رسنيزې تبصره کې څرګنده کړه چې د جګړې دوام به پر امريکا درانه مالي فشارونه واچوي او د دغو فشارونو بشپړ ابعاد به د وخت په تېرېدو څرګند شي. د هغه په باور، څومره چې نښته اوږده شي، هغومره به د واشنګټن اقتصادي او پوځي لګښتونه ډېر شي.
دغه پخواني پينټاګون چارواکي دا هم وويل چې د فارس خليج ځينې هېوادونه ښايي د امريکا پر حضور د مخالفت دريځ ونيسي؛ يو موضوع چې د هغه په وينا، د متحده ايالاتو نفوذ په سيمه کې کمولی شي. نوموړي د عراق د وضعيت يادونه هم وکړه او ويې ويل چې د دغه هېواد ځينې سياسي جريانونه د امريکايي ځواکونو د وتلو غوښتنه کوي.
مکګرېګور ټينګار وکړ چې که جګړه دوام وکړي، د امريکا او اسرائيلو موقعيت به کمزوری شي او ايران به د دغو حالاتو د زغملو توان ولري. هغه دا وضعيت د واشنګټن لپاره «سخت» وباله.
په عين حال کې، د امريکا او اسرائيلو وروستيو بريدونو پر ايران او د تهران متقابلو غبرګونونو سيمهييزې تاوترخوالي زيات کړي دي. دغه پرمختګونو د هرمز تنګي پر تګ راتګ، چې د نړۍ د نفتو او ګازو له مهمو لارو څخه شمېرل کېږي، اغېز کړی او د نړيوالو بازارونو د انرژۍ بيې يې لوړې کړې دي. ځينو شنونکو خبرداری ورکړی چې د امريکا د ولسمشر ډونالډ ټرمپ پرېکړه د ايران پر ضد د بريد لپاره، د دغه هېواد د اقتصاد د بېباورۍ فضا نوره هم پراخولای شي.
