په آلمان کې د افغانانو لپاره د پاسپورت وېش بهیر پیل شو
د طالبانو د ادارې اړوند قونسلګرۍ په بن ښار کې اعلان کړی چې په آلمان کې مېشت افغان وګړو ته د پاسپورت د صادریدو او وېش لړۍ په رسمي توګه پیل شوې ده. د دې نمایندګۍ د خبرپاڼې له مخې، شاوخوا څلور زره پاسپورتونه د چاپ په پړاو کې دي او ډېر ژر به غوښتونکو ته وسپارل شي.
په خبرپاڼه کې ویل شوي چې دغه پاسپورتونه به د چاپ د بهیر له بشپړېدو وروسته د غوښتونکو او په آلمان کې مېشت افغانانو ترمنځ ووېشل شي. خو د وېش د دقیق پیل نېټه لا نه ده روښانه شوې.
وروسته له سیاسي بدلونونو او د طالبانو د ادارې د تسلط راهیسې، په ډېرو هېوادونو کې د قونسلي خدمتونو بهیر له حقوقي او تخنیکي ستونزو سره مخ شوی دی. په اروپا کې یو شمېر افغانانو تر دې وړاندې د هویت اسنادو د صادریدو د بهیر له ځنډ او د قونسلي خدمتونو د لاسرسي له محدودیت څخه شکایتونه کړي دي.
آلمان د هغو هېوادونو له ډلې څخه دی چې د افغان پناهوالو او مهاجرینو یوه د پام وړ وګړې پکې مېشته ده، او د قانوني استوګنې د تمدید، اداري چارو ترسره کولو او قانوني سفرونو لپاره د بااعتباره پاسپورت شتون بنسټیز اهمیت لري.
