دوه امريکايي سناتوران د ايران له جګړې سره مخالفت څرګندوي
د امريکا دوه سناتورانو د ايران پر وړاندې د جګړې له پيل او دوام سره مخالفت کړی دی. اليزابت وارن، چې د امريکا د ډيموکرات ګوند سناتوره ده، له يوې محرمې غونډې وروسته وويل چې له ايران سره د جګړې حالت «د عام تصور نه ډېر اندېښمنوونکی» دی او د دونالډ ټرمپ اداره په دې برخه کې څرګنده تګلاره نه لري.
وارن وويل چې تر دې مخکې هم د ايران له وضعيته اندېښنه لرله، خو د تړلې ناستې د نويو معلوماتو تر ترلاسه کولو وروسته يې اندېښنه نوره هم زياته شوې ده. د هغې په وينا، د ټرمپ اداره تر اوسه د جګړې د موخو او لوري په اړه قناعت بښونکی وضاحت نه دی ورکړی.
دغه امريکايي سناتوره دا هم وويل چې د ايران پر ضد پوځي اقدام پر ناسم دلايلو ولاړ دی او له قانوني پلوه روښانه بنسټ نه لري. هغې زياته کړه چې د هغې په باور، پر متحده ايالاتو باندې هېڅ فوري ګواښ نه و او د امريکا ولسمشر هم د جګړې د پيل لپاره څرګند دليل نه دی وړاندې کړی.
وارن د جګړې له انساني تلفاتو خواشينې څرګنده کړه او وويل چې د دې شخړې د پای ته رسېدو لپاره به خپلو هڅو ته دوام ورکړي.
په همدې حال کې، د نيويارک ټايمز ورځپاڼې راپور ورکړی چې چاک شومر، چې د امريکا په سنا مجلس کې د اقليت مشر دی، هم د ټرمپ د ادارې له لوړپوړو چارواکو سره تر يوې محرمې غونډې وروسته د جګړې د پراخېدو د احتمال په اړه خپله اړتيايي اندېښنه څرګنده کړې ده.
شومر ويلي چې دا د تړلو دروازو تر شا ناسته «قناعت بښونکې» نه وه او د امريکا د دولت چارواکو د ولسمشر د پرېکړې په اړه بېلابېلې څرګندونې کړې دي. هغه غوښتنه کړې چې د دې پوځي اقدام د موخو او پايلو په اړه بايد زيات شفافيت رامنځته شي.
