دراني: د طالبانو سره د پاکستان کړکېچ خطرناک پړاو ته رسېدلی
آصف دراني، چې د افغانستان لپاره د پاکستان پخوانی ځانګړی استازی و، ويلي دي چې د پاکستان او د طالبانو د ادارې ترمنځ د نښتو زياتوالی د دواړو اړخونو اړيکې يو خطرناک پړاو ته رسولی دی. هغه ټينګار کړی چې د تحريک طالبان پاکستان (TTP) فعاليتونه د افغانستان د طالبانو تر ملاتړ لاندې پراخېږي او دا وضعيت د اسلاماباد لپاره جدي امنيتي اندېښنې زېږولې دي.
دراني د جمعې په ورځ د حوت په اتمه نېټه وويل، د پاکستان لهخوا کابل ته د رسمي احتجاجونو او پرلهپسې غوښتنو باوجود، د طالبانو لهخوا تر اوسه هېڅ عملي او محسوس ګام نه دی پورته شوی. د هغه په وينا، دا بېپاسخي په پاکستان کې دا انګېرنه پياوړې کړې چې طالبان د TTP له پاکستان ضد اجنډا سره همغږي دي.
هغه زياته کړه چې پر پاکستاني سرحدي پوستو وروستيو حملو هغه هڅې کمزورې کړې چې د ځينو دوستو هېوادونو په منځګړيتوب د تاوتريخوالي کمولو لپاره پيل شوې وې. د دراني په باور، که دغه چلند دوام ومومي، د ډيپلوماتيکو فرصتونو دا کړکۍ به د لا زيات تاوتريخوالي د مخنيوي لپاره نوره هم محدوده کړي.
د پاکستان پخواني استازي همدارنګه د طالبانو او هند ترمنځ د اړيکو پراخېدو ته اشاره وکړه او ويې ويل چې دا موضوع د اسلاماباد ستراتيژيکې اندېښنې زياتې کړې دي. هغه يادونه وکړه چې تر دې وړاندې هم داسې ادعاوې شوې وې چې هند د تحريک طالبان پاکستان او د بلوچستان د ازادۍ د پوځ په څېر ډلو ملاتړ کوي.
که څه هم د طالبانو اداره تل د پاکستان ضد وسلهوالو ډلو د ملاتړ تورونه رد کړي، خو منتقدان وايي، د دغو ډلو د مهار لپاره د روښانه او عملي اقدام نشتوالی د دواړو ګاونډيانو اړيکې له ستونزو سره مخ کړې او په سيمه کې د لا زياتې بېثباتۍ خطر زيات کړی دی.
