مارکوس روبیو: د اوکراین جګړه پوځي حل نه لري، ډیپلوماتیکې هڅې مهمې دي
د امریکا د بهرنیو چارو وزیر مارکوس روبیو اعلان کړی چې د اوکراین جګړه پوځي حل نه لري او یوازې د ډیپلوماتیکو لارو له لارې پای ته رسېدای شي. هغه ټینګار کړی چې د پوځي وسایلو له لارې د جګړې دوام به نتیجه ورنه کړي او سیاسي هڅې باید لومړیتوب ولري.
روبیو همدارنګه خبرداری ورکړی چې د امریکا د ولسمشر ډونالډ ټرمپ زغم د اوکراین د تړون د ترلاسه کولو د بهیر په وروتيا کې محدود دی. د ده په وینا، واشنګټن غواړي چې په خبرو اترو کې څرګند پرمختګ رامنځته شي.
د امریکا د بهرنیو چارو وزیر د روانو خبرو اترو په اړه ویلي چې لا هم د اوکراین د خبرو په بهیر کې یو شمېر پېچلي پوښتنې پاتې دي، خو د تېرو وختونو په پرتله د دغو ابهامونو کچه کمه شوې ده.
هغه د خپلو خبرو په بله برخه کې د لویو قدرتونو ترمنځ د اټومي وسلو اړوند موافقو ته هم اشاره وکړه او څرګنده یې کړه چې هر ډول تړون په دې برخه کې باید د امریکا، چین او روسیې په ګډون ترسره شي. د روبیو په وینا، دغه ډول تړون کولای شي د نړیوال سولې د پیاوړتیا لپاره اغېزمن تمام شي.
