نړیوالو ادارو له پاکستانه د افغان خبریالانو د ایستلو د درولو غوښتنه وکړه
یو شمېر نړیوالو بنسټونو چې د بیان ازادۍ او بشري حقونو ملاتړ کوي، د پاکستان د لومړي وزیر شهباز شریف په نوم په یوه لیک کې غوښتنه کړې چې د افغان خبریالانو د نیولو او ایستلو لړۍ سمدستي ودروي. دغو ادارو ټینګار کړی چې اسلاماباد باید د پناه غوښتونکو د نه شړلو له اصولو سره وفادار پاتې شي.
په دې لیک کې چې د چهارشنبې په ورځ، د کب شپږمه، لېږل شوی، د افغان خبریالانو د وروستیو نیونو او ایستلو زیاتوالی «د اندېښنې وړ» بلل شوی دی. د لیک لاسلیک کوونکو خبرداری ورکړی چې ډېری افغان خبریالان د طالبانو له واکمنېدو وروسته، د خپلې مسلکي دندې له امله له ګواښونو او فشارونو سره مخ شوي او اړ شوي چې له هېواده ووځي.
د دغو ادارو په وینا، د افغانستان ته د دغو خبریالانو بېرته ورلېږل کولای شي هغوی د طالبانو د ادارې له لوري د غچ اخیستونکو نیونو، خودسرانه چلند، تاوتریخوالي او آن د مرګ له خطر سره مخ کړي. د بشري حقونو سازمانونو ټینګار کړی چې په افغانستان کې خپلواکه خبریالان له پراخو محدودیتونو او سیستماتیکو ځپنو سره مخ دي، او هر ډول جبري شړنې به د هغوی ژوند له جدي ګواښ سره مخ کړي.
په دې لیک کې له پاکستاني حکومت غوښتنه شوې چې پرته له دې چې د ایستلو لړۍ ودروي، باید خپلو نړیوالو ژمنو ته د پناه غوښتونکو او له خطر سره مخ خبریالانو د ملاتړ په برخه کې درناوی وکړي. دا غوښتنه په داسې حال کې وړاندې کېږي چې د پاکستان دننه د رسنیو د ازادۍ په اړه اندېښنې هم زیاتې شوې دي.
لاسلیک کوونکو د سهراب برکات له ۹۰ ورځو زیات بند، چې د ۲۰۱۶ کال د سایبري جرمونو د مخنیوي د قانون له مخې شوی، یادونه کړې او همدارنګه یې د ارشد شریف او شان داهر په څېر د خبریالانو د وژنو د دوسیو د نه شفافیت په اړه اندېښنه څرګنده کړې ده. هغوی خبرداری ورکړی چې د دې وضعیت دوام به هم د پاکستاني خبریالانو او هم د تبعید افغان خبریالانو ژوند له جدي ګواښونو سره مخ کړي او د پاکستان د رسنیو د کار فضا به نوره هم محدوده کړي.
