عفو بینالملل د ننګرهار د ملکي کسانو د تلفاتو د څېړنې غوښتنه وکړه
د عفو بینالملل سازمان د پاکستان د هوايي بریدونو له امله په ننګرهار ولایت کې د غیرنظامي کسانو د وژل کېدو او ټپې کېدو په اړه ژوره اندېښنه څرګنده کړې او د یو بشپړ، خپلواک او بېپروایې څېړنې غوښتنه یې کړې ده. دغه بریدونه د فبرورۍ په ۲۱ او ۲۲ نېټو د دغه ولایت په ځینو سیمو کې شوي دي.
دغه بشري حقونو سازمان ټینګار کړی چې د وسلهوالو شخړو پر مهال د ملکي کسانو ساتنه د نړیوال بشردوستانه قانون یو اساسي اصل دی او ټول ښکېل اړخونه مکلف دي چې د ملکي وګړو د زیان مخنیوي لپاره لازم اقدامات ترسره کړي.
عفو بینالملل یادونه کړې چې دا د سرحدي ترینګلتیاوو په ترڅ کې د ملکي کسانو د زیان لومړۍ پېښه نه ده. له دې وړاندې، په افغانستان کې د ملګرو ملتونو مرستندوی ماموریت (یوناما) راپور ورکړی و چې د ۲۰۲۵ کال د اکتوبر او دسمبر ترمنځ لږ تر لږه ۷۰ ملکي وګړي وژل شوي او ۴۷۸ تنه نور ټپیان شوي دي. دا پېښې د پاکستاني پوځ په ځواکونو پورې تړلې ښودل شوې وې او د طالبانو د ادارې او د پاکستاني ځواکونو ترمنځ د زیاتېدونکو ترینګلتیاوو په لړ کې رامنځ ته شوې وې.
په وروستیو میاشتو کې د افغانستان او پاکستان ترمنځ د پولهيې سیمې پر اوږدو د نښتو زیاتوالی د سیمهیزو اوسېدونکو د اندېښنې سبب شوی دی. سره له دې، تر اوسه د یادو تازه پېښو د ممکنه څېړنو روښانه جزئیات نه دي خپاره شوي.
عفو بینالملل له ټولو ښکېلو اړخونو، په شمول د پاکستاني چارواکو او د طالبانو د ادارې له مسوولینو غوښتنه کړې چې د خپلو نړیوالو ژمنو په درناوي سره د دې ډول پېښو له تکرار څخه مخنیوی وکړي او د ملکي تلفاتو په اړه د حساب ورکونې ډاډ ورکړي.
